काठमाडौँ । केही दिनअघि नेकपा (माओवादी केन्द्र) का अध्यक्ष पुष्पकमल दाहाल ‘प्रचण्डल’ले उद्योग र उत्पादनका क्षेत्रमा पूँजीको लगानी हुन छाडेर पूँजी बजारमा आउनु साम्राज्यवादको विकसित रुप भएको बताएपछि सेयर बजार अत्यधिक प्रभावित हुन पुग्यो । प्रचण्डको उक्त अभिव्यक्तिप्रति व्यापक आलोचना भएको छ । सेयर लगानीकर्ता, राजनीतिक दल, बैंकर तथा कलाकारहरुले उनको तीखो आलोचना गरेका छन् ।
पुँजी बजारमा लगानी हुनु साम्राज्यवादको विकसित रुप हो : प्रचण्ड
अझ सेयर लगानीकर्ताहरुले त माओवादी केन्द्र विरुद्ध ‘नो भोट’ अभियान नै चलाएका छन् । प्रचण्डको पूँजी बजार क्षेत्रमा गैरजिम्मेबार अभिव्यक्तिप्रति आपत्ति जनाउने क्रम अहिले पनि जारी छ । अर्थमन्त्री जनार्दन शर्माको सेयर बजारप्रतिको उदासीनता, नेपाल राष्ट्र बैंकले सेयर बजारलाई प्रभावित पार्ने गरी मौद्रिक नीतिमार्फत ल्याएको व्यवस्था आदिले करिब ३२०० पुगेको नेप्से २३०० को लाइनमा आइपुगेको छ । प्रचण्डको पछिल्लो अभिव्यक्तिले त यसलाई आगोमा घिउ छर्किने काम गरेको छ ।
सेयर बजार घट्नुमा मेरो कुनै हात छैनः अर्थमन्त्री
सेयर बजारलाई प्रभावित गर्ने गरी अभिव्यक्ति दिने प्रचण्ड पहिलो नेता भने होइनन् । विगतमा धेरै राजनीतिक दलका नेताले सेयर बजारप्रति गैरजिम्मेबार र नकारात्मक अभिव्यक्ति दिएका छन् । प्रधानमन्त्रीसमेत भइसकेका पूर्व अर्थमन्त्री डा. बाबुराम भट्टराईले सेयर बजारलाई ‘जुवा घर’ भन्ने अभिव्यक्ति दिएका थिए भने पूर्वअर्थमन्त्री डा युवराज खतिवडाले सेयर बजार र घरजग्गा कारोबारप्रति नकारात्मक टिप्पणी गरेका थिए । नेपाल राष्ट्र बैंकको गभर्नर हुँदादेखि नै उनी सेयर बजार र घरजग्गा कारोबारप्रति असन्तुष्ट थिए । वर्तमान अर्थमन्त्री जनार्दन शर्माले समेत सेयरबजारका बारेमा नकारात्मक टिप्पणी गरेका छन् ।
यद्यपि आफ्नो पार्टीका अध्यक्ष प्रचण्डको अभिव्यक्तिसँगै व्यापक आलोचना भएपछि उनले पछिल्लो समयमा सेयरबजारका बारेमा सकारात्मक टिप्पणी गरेका छन् । सेयरबजारसम्बन्धी जानकारहरुका अनुसार सेयरबजार अत्यन्त संवेदनशील क्षेत्र हो । नेताहरुको टिप्पणीले यस्तो संवेदनशील क्षेत्र अति प्रभावित बन्न पुग्छ । सेयर बजारमा अहिले करिब ४७ लाखले डिम्याट खाता खोलेका छन् । उनीहरुको त्यहाँ सानो सानो भए पनि पूँजी लगानी भएको हुन्छ । नेताहरुको नकारात्मक टिप्पणीले ठूला खेलाडीलाई सेयर बजारलाई प्रभावित बनाउन सहज बनाइदिन्छ ।
उनीहरुको सेयरबजारमा ठूलो पकड हुने भएकाले सेयरको मूल्य घटाउने वा बढाउनेमा उनीहरुको चलखेल बढी हुन्छ । जसबाट साना लगानीकर्ता प्यानिक भएर आफ्नो सेयर नोक्सान खाएर विक्री गर्न बाध्य हुन्छन् । अहिले नेकपा माओवादीले ठूला लगानीकर्ताले कमाए भनेर सेयरबजारलाई सङ्कटग्रस्त बनाउन लागेको जस्तो देखिन्छ । यसले ठूला लगानीकर्ताभन्दा बढी चोट साना लगानीकर्तालाई परेको छ । त्यसैले पूँजीबजारबारे बोल्दा नेताहरुले अधिक सतर्क भएर बोल्नुपर्छ । बरु केही नबोले केही फरक पर्दैन ।
