काठमाडौं । गत असारमा आएको बाढीका कारण क्षतिग्रस्त भएका सिँचाइ संरचना पुनर्निर्माणका लागि सवा २ अर्व रुपैयाँ लाग्ने भएको छ ।
ऊर्जा, जलस्रोत तथा सिँचाइ मन्त्री वर्षमान पुनले बिहीबार पत्रकार सम्मेलन गरी क्षतिग्रस्त संरचनाका लागि २ अर्ब ११ करोड २२ लाख लाग्ने जानकारी दिएका हुन् ।
उर्जा, जलस्रोत तथा सिञ्चाई मन्त्रीले बिहिबार मन्त्रालयमा पत्रकार सम्मेलन गरि सम्भावित बाढीका बारेमा बर्षाद पूर्व जल तथा मौसम विभागबाट पूर्व सूचना जारी गरिएकाले आवश्यक सतर्कता अपनाइएको र बाढीको समयमा जलश्रोत तथा सिञ्चाई विभाग अन्तर्गतका कार्यालयबाट आपतकालीन बचावटका कार्य सञ्चालन गरिएकाले अनुमान गरेभन्दा कम क्षति भएको बताए ।
गत बर्ष ५ अर्ब बजेट निकासा भएकोमा यस बर्ष साढे २ अर्ब मात्रै भएको भन्दै उनले सबै बजेट स्थानीय तहमा गएकाले नदी संरक्षण, नियन्त्रण र जोखिम न्यूनीकरणका लागि तीनवटै सरकारबीच समन्वय आवश्यक पर्ने बताए ।
गत असार २७ देखि २९ गतेसम्मको अबिरल वर्षाका कारण नदी तथा स्थानीय खोलामा आएको बाढीका कारण तराईलगायत मुलुकका विभिन्न स्थानका सिँचाइ आयोजना तथा तटबन्धहरु क्षतिग्रस्त भएका छन् ।