काठमाडौँ । नेपाली कांग्रेसको १४औँ महाधिवेशनका सन्दर्भमा भएका मतगणनामा नेताहरुलाई झिनो मतको सकस परेको छ । उपसभापति पदका लागि भएको मतगणनामा पार्टी संस्थापन पक्षबाट उम्मेदवारी दिएका विजयकुमार गच्छदार दुई मतको अन्तरले पराजित हुनुभयो । महाधिवेशनले दुई उपसभापति निर्वाचित गर्ने व्यवस्थाबमोजिम भएको मतदानमा उहाँले एक हजार ९०६ मत प्राप्त गर्नुभयो । संस्थापन इतर पक्षका धनराज गुरुङले दोस्रो सबैभन्दा धेरै एक हजार ९०८ मत ल्याई उपसभापति पदमा विजयी हुनुभयो ।
यसै महाधिवेशनका सन्दर्भमा प्रदेश अधिवेशनका लागि प्रदेश नं १ मा भएको मतदानमा प्रदेश सभापतिमा संस्थापन पक्षसँग मिलेर कृष्णप्रसाद सिटौलाको तेस्रो समूहबाट उम्मेद्वारी दिनुभएका उद्धव थापाले संस्थापन इतर पक्षका गुरुराज घिमिरेलाई दुई मतले नै पराजित गर्नुभयो । थापाले ८४४ र घिमिरेले ८४२ मत पाउनुभएको थियो ।
पार्टीको १३ औँ महाधिवेशनमा समेत झिनो मतका कारण विजयी हुननसकेपछि पार्टी सभापति पदका लागि पुनः मतदान गर्नुपरेको थियो । १३औँ महाधिवेशनको पहिलो चरणमा शेरबहादुर देउवाको १५४६ मत आएको थियो । उहाँले ५० प्रतिशतभन्दा बढी मत पाउन सक्नुभएको थिएन । कांग्रेसको विधानमा सभापतिका उम्मेदवारले ५१ प्रतिशत मत पुर्याउनै पर्छ । देउवालाई जित्नका लागि १५ सय ७५ मत आवश्यक थियो । त्यतिबेला पनि देउवाको ११ मत कम हुँदा दोस्रो चरणमा सभापतिको निर्वाचन भएको थियो ।
पार्टीको १४औँ महाधिवेशनमा भएका निर्वाचनमा पार्टी सभापति र उपसभापतिको नतिजा आइसकेको छ । अहिले दुई जना महामन्त्रीका लागि मतगणनाजारी छ । त्यस्तै सहमहामन्त्री र केन्द्रीय सदस्यहरुको मतगणना हुन बाँकी नै छ । ती मतगणनामा पनि नेताहरुलाई जितका लागि झिनो मतको सकस पर्ने हो कि हेर्न बाँकी छ ।
