बुटवल । पार्टी नेता कार्यकर्तालाई चुनाव कसरी जित्ने भनेर प्रशिक्षण दिने बेला आईसकेको नेपाली कांग्रेसका सभापति शेरबहादुर देउवाले बताएका छन् । सोमबार केन्द्रीय नीति, अनुसन्धान तथा प्रशिक्षण प्रतिष्ठानले रुपन्देहीको भैरहवामा गरेको कार्यक्रममा कांग्रेस सभापति देउवाले अहिले भोटको राजनीति भएको बताए ।
मिठो भाषणले मात्र चुनाव नजित्ने भन्दै जनतामा जान उनले नेताहरुलाई आग्रह गरेका हन् । उनले भने, ‘भाषणले भोट आउने भए मलाई भन्दा धेरै राम्रो बोल्न आउने नेताहरु छन् तर हारे,’ उनले भने, ‘अब चुनाव कसरी जित्ने भनेर प्रशिक्षण दिनुपर्यो ।’ कार्यक्रमस्थलमा चारतारे झण्डा मात्र राखिएको देखाउँदै उनले रुख खोई भन्ने प्रश्न गरे ।
अरु पार्टीको कार्यक्रममा झण्डासँगै चुनाव चिह्न पनि राख्ने गरेको उल्लेख गर्दै देउवाले भने, ‘यहाँ रुख कहिँ छ ? चारतारे झण्डा मात्र छ ।’ उनले ठट्टा गर्दैै भने,’ यदि रुख अरुले नपाउने भए चारतारे झण्डा नै चुनाव चिन्ह राख्न हुन्थ्यो ।’
देउवाअघि कार्यक्रमलाई सम्बोधन गरेका वरिष्ठ नेता रामचन्द्र पौडेलले पार्टीमा गुट अन्त्य गर्नुपर्ने र यसका लागि न्याय, निश्पक्षता र पारदर्शीता हुनुपर्ने बताएका थिए । देउवाले सम्बोधनको सुरुमै वरिष्ठ नेता पौडेललाई जवाफ दिदै पारदर्शिता हुनुपर्छ भन्नु राम्रो भएको बताएका थिए ।