काठमाडौं । सोमबार राजधानीमा आयोजित एक कार्यक्रममा बोल्दै पूर्वप्रधानमन्त्री एवं नेकपाका बरिष्ठ नेता झलनाथ खनालले माथिल्लो कर्णाली परियोजनासम्बन्धमा जीएमआरसँग भएको सम्झौता नेपालको हितविपरीत भएको बताए । यो आयोजना नेपालको हितअनुकुल निर्माण हुनुपर्ने खनालले बताए ।
सत्तारुढ नेपाल कम्युनिस्ट पार्टीका नेताहरुले माथिल्लो कर्णाली जलविद्युत आयोजनामा भारतीय कम्पनी जीएमआरसँग गरिएको सम्झौता खारेज गर्न सरकारसँग माग गरेका हुन् । ‘माथिल्लो कर्णाली र बुढीगण्डकी परियोजना राष्ट्रहितको संरक्षण’ विषयक अन्तरक्रिया कार्यक्रममा बोल्दै पूर्वउपप्रधानमन्त्री भीम रावलले जीएमआरसँग भएको माथिल्लो कर्णाली सम्झौता र विद्युत विकास सम्झौता दुबै नेपालको हितमा नभएको बताएका हुन् ।
ती सम्झौता खारेज गरेर माथिल्लो कर्णाली नेपाल आफैंले बनाउनुपर्ने रावलले जिकीर गरे ।माथिल्लो कर्णाली सम्झौता खारेज भई उक्त आयोजना नेपालको पक्षमा निर्माण नभए त्यसका विरुद्ध ठूलो आन्दोलन उठ्ने चेतावनीसमेत नेकपा नेता रावलले दिएका छन् ।
आयोजना प्रभावित क्षेत्रका बासिन्दासमेत रहेका रावलले जीएमआरले माथिल्लो कर्णालीमा बाँध निर्माणका नाममा तल्लोतटीय क्षेत्रमा कर्मचारीहरुको सञ्चय कोषको लगानीमा एकलौटी लाभ हात पार्न खोजेको गुनासो पनि गरेका छन् ।
