एजेन्सी । भ्रष्टाचारको मुद्धा खेपिरहेका सुडानका पूर्व राष्ट्रपति ओमर अल बशीरले साउदी अरबबाट लाखौँ डलर लिएको आरोप लागेको छ । सुडानका एक गुप्तचार अधिकारीले साउदी अरेबियाबाट बशीरले लाखौं डलर लिएको रहस्य खोलेका हुन् । सोमबार भ्रष्टाचारको आरोपको सामना गर्न बशीर अदालतमा उपस्थित भएका थिए ।
महिनौ लामो विरोध प्रदर्शनपछि गत अप्रिलमा बशीरलाई सत्ताच्यूत गरिएको थियो । बशीर झण्डै तीन दशकसम्म लगातार सुडानको सत्तामा थिए । उनका वकिलले भने बशीरमाथि लगाइएका उक्त अभियोग अधारहीन भएको दाबी गरेका छन् ।
गत जुन महिनामा बशीरको निवासबाट अन्न राख्ने बोरामा ठूलो परिमाणको विदेशी रकम फेला परेको दावी अनुसन्धानकर्ताले गरेका छन् । लोकतन्त्र समर्थक र बशीरलाई सत्ताच्युत गरेका सैनिक नेतृत्वबीच छिटै निर्वाचन गराउने एउटा सहमति पत्रमा आइतबार मात्रै हस्ताक्षर भएको थियो । प्रहरी अनुसन्धानकर्ता अहमद अली मोहम्मदका अनुसार बशीरले साउदी अरेबियाका राजकुमार मोहम्मद बिन सलमानबाट २.५ करोड डलर लिएको छ ।
उनले भनेको छन्, ७५ वर्षीय पूर्व राष्ट्रपति बशीरले साउदी अरेबियाबाट अरु पनि रकम लिएका छन् । बशीरसँग भएको धन अवैध हो भन्नेबारे कुनै ठोस प्रमाण र सूचना नभएको बशीरका वकिलले बताएका छन् । सेतो पहिरन लगाएर टाउकोमा फेटा बाँधेका पूर्व राष्ट्रपति बशीर अदालतको पछाडि गेटमा देखा परेका थिए ।
समाचार एजेन्सी रोयटर्सका अनुसार बशीरले आफूमाथि लगाइएको अभियोगकोबारेमा कुनै टिप्पणी गरेनन् ।
