काठमाडौं । राष्ट्रिय सभाका सांसदहरूले बलात्कार तथा हत्या, महिला हिंसा, सर्वोच्च अदालतमा भएको तोडफोड तथा बाढीका कारण प्रभावित नागरिकको अवस्थालगायतका विषयमा सरकारको ध्यानाकर्षण गराएका छन् ।
शुक्रबार राष्ट्रिय सभाको बैठकमा शून्य समयमा बोल्दै सांसद पूजा चौधरीले तीन वर्षीया बालिका गरिमा चौधरीको बलात्कार तथा हत्या घटनामा संलग्न अभियुक्तमध्ये केहीलाई बाल सुधारगृह पठाइएको तथा अन्यलाई धरौटी र तारेखमा छाडिएको विषयमा प्रश्न उठाउनुभयो । क्रूर अपराधमा संलग्न व्यक्तिलाई सामान्य धरौटी र तारेखमा छाड्दा समाजमा गलत सन्देश जाने भन्दै उहाँले घटनाको निष्पक्ष छानबिन गर्न सरकारसँग माग गर्नुभयो ।
अपराधको प्रकृतिअनुसार कडा सजाय सुनिश्चित गर्न आवश्यक परे कानुन संशोधन गर्नुपर्ने उहाँको भनाइ थियो ।
सांसद रुक्मिणी कोइरालाले नवलपरासीको त्रिवेणी–३ मा शेरबहादुर विकले आफ्नी श्रीमतीको खुर्पा प्रहार गरी हत्या गरेको घटनाप्रति दुःख व्यक्त गर्नुभयो । तीजको व्रत बसेकी श्रीमतीको हत्या भएको उल्लेख गर्दै उहाँले घटनाको निष्पक्ष अनुसन्धान गरी दोषीलाई कडा कारबाही गर्न माग गर्नुभयो ।
कोइरालाले कैलालीको धनगढीमा प्रहरी जवानमाथि महिलालाई बलात्कार गरेको आरोप तथा तीन वर्षीया बालिकामाथि भएको बलात्कार र हत्याको घटनाबारे पनि सरकारको ध्यानाकर्षण गराउनुभयो । यस्ता घटनामा संलग्न व्यक्तिमाथि सरकारले के कारबाही गरिरहेको छ भन्नेबारे उहाँले प्रश्न गर्नुभयो ।
यसैगरी सांसद विष्णुबहादुर विश्वकर्माले सर्वोच्च अदालतमा भएको तोडफोड तथा क्षतिबारे न्यायिक छानबिन गर्न माग गर्नुभयो । सर्वोच्च अदालतमा नियोजित तथा षड्यन्त्रपूर्ण ढंगबाट आक्रमण भएको दाबी गर्दै उहाँले घटनाको उच्चस्तरीय छानबिन समिति गठन गरी दोषीमाथि कडा कारबाही गर्न सरकारसँग आग्रह गर्नुभयो ।
सर्वोच्च अदालत आफैँ वा कुनै दुर्घटनाका कारण क्षतिग्रस्त नभएको दाबी गर्दै विश्वकर्माले घटनाको वास्तविकता सार्वजनिक गर्नुपर्ने बताउनुभयो ।
सांसद श्रीकृष्णप्रसाद अधिकारीले रसुवाका विभिन्न क्षेत्रमा बाढीका कारण सडक, पुल तथा बजारसम्मको आवागमन अवरुद्ध हुँदा स्थानीय नागरिक खाद्यान्न अभावको जोखिममा परेको विषय उठाउनुभयो । भोटेकोशी नदीमा आएको बाढीका कारण बाटो, पुल, सडक तथा अन्य संरचनामा क्षति पुगेपछि आमाछोदिङ्मो र गोसाइँकुण्ड गाउँपालिकालगायत माथिल्लो क्षेत्रका नागरिकको जनजीवन प्रभावित भएको उहाँले बताउनुभयो ।
बाढी प्रभावित क्षेत्रमा तत्काल ड्रोन तथा हेलिकप्टरमार्फत दैनिक उपभोग्य वस्तु, खाद्यान्न, लत्ताकपडा र औषधि पुर्याउन तथा स्थानीय तहसँग समन्वय गरी सडकमार्ग यथाशीघ्र सञ्चालन गर्न अधिकारीले सरकारसँग माग गर्नुभयो।
