जनकपुरधाम । १५ वर्षदेखि रुग्ण आयोजनाका रूपमा रहेको हुलाकी राजमार्गअन्तर्गत कमला नदीको पुल निर्माणको काम अन्तिम चरणमा पुगेको छ । मधेशको ‘मेरुदण्ड’ मानिने हुलाकी राजमार्गअन्तर्गत धनुषा र सिराहालाई जोड्ने कमला नदीको पुल अबको दुई महिनाभित्र औपचारिक रूपमा सञ्चालनमा ल्याउने गरी निर्माण अघि बढाइएको हो ।
पूर्वाधार विकास मन्त्रालयले लामो समयदेखि रोकिएको आयोजनाको मुख्य समस्या पहिचान गरी निर्माण कम्पनीलाई आवश्यक सहजीकरण गरेपछि बाँकी कामले गति लिएको हो । ठेकेदार कम्पनी र बीमा कम्पनीबीचको कानुनी विवादका कारण पुल निर्माण लामो समयदेखि रुग्ण अवस्थामा रहेको थियो ।
पुल निर्माणका क्रममा नदीमा भाँचिएको दशौँ नम्बरको पिलर उठाउने काम सम्पन्न भइसकेको छ । सब–स्ट्रक्चरको ढलान कार्यसमेत सकिएको मन्त्रालयले जनाएको छ । पुलको फाउन्डेसनसहित तीनवटा पिलरको सबलीकरणको काम पनि पूरा भएको छ ।
अब सुपर स्ट्रक्चरको स्ल्याबमाथि ढलान गर्ने काम मात्र बाँकी रहेको छ । आगामी हप्ता नदीमा पानीको सतह घटेपछि उक्त कामसमेत सम्पन्न गर्ने तयारी छ ।
धनुषातर्फ पुलसम्म पुग्ने पहुँच सडकका लागि माटो भर्ने काम भए पनि वर्षाको पानीले बगाउँदा क्षति पुगेको छ । नदीमा पानीको सतह घटेपछि पुनः माटो भर्ने काम गरिनेछ । सिराहातर्फको पहुँच सडकमा भने माटो भर्ने काम सम्पन्न भइसकेको छ । पुलको लोड परीक्षणसमेत सम्पन्न भइसकेको मन्त्रालयले जनाएको छ ।
२०६८ सालमा पप्पु लुम्बिनी जेभीले कमला नदी पुल निर्माणको ठेक्का लिएको थियो । निर्माण सम्पन्न गरी २०७८ साल असारमा पुल उद्घाटन गर्ने तयारी भइरहेका बेला पिलर भाँचिएपछि आयोजना रुग्ण अवस्थामा पुगेको थियो ।
सरकारले आयोजनामा भइरहेको ढिलाइको मुख्य कारण पहिचान गरी आवश्यक सहजीकरण गरेपछि निर्माणले गति लिएको हो । मन्त्रालयले अबको दुई महिनाभित्र पुललाई औपचारिक रूपमा सञ्चालनमा ल्याउने लक्ष्यसहित काम अघि बढाएको जनाएको छ ।
यसैबीच, मन्त्रालयले पुल निर्माणसँगै कमला नदी नियन्त्रणको कामसमेत अघि बढाएको छ । नदी नियन्त्रणका लागि सरकारले २५ करोड रुपैयाँ बजेट सुनिश्चित गरिसकेको छ । डिजाइन स्वीकृत गरी आह्वान गरिएको बोलपत्रमा संयुक्त उपक्रमसहित १९ वटा कम्पनीले सहभागिता जनाएका छन् ।
मन्त्रालयले आगामी हप्तासम्म प्राविधिक मूल्याङ्कन सम्पन्न गरी आर्थिक प्रस्ताव खोल्ने सूचना जारी गर्ने तयारी गरेको छ ।
