झापा। मेची भन्सार नाका हुँदै हुने व्यापारमा आयात र निर्यातको अन्तर निकै ठूलो देखिएको छ । पूर्वी नाका काँकडभिट्टा हुँदै निर्यात भएका वस्तुको तुलनामा आयात भएका वस्तुको व्यावसायिक मूल्य उच्च छ । ‘आयात–निर्यातको अन्तर डरलाग्दो देखिएको छ,’ भन्सार अधिकृत भरतराज अधिकारीले भने ‘व्यापार घाटाका दृष्टिले सबै भन्सार नाकाहरूको आयात–निर्यातको अन्तर यस्तै देखिन्छ, यो नाका पनि फरक रहन सकेन ।’
गत आवमा काँकडभिट्टा ,नाका हुँदै नेपालबाट ९ अर्ब ७२ करोड २५ लाख रुपैयाँको मालवस्तु भारतलगायत तेस्रो मुलुकमा निर्यात भएको छ । यसमा नेपालको कृषिजन्य उत्पादन अलैँचीको हिस्सा सबैभन्दा बढी छ । कुल निर्यात रकममध्ये २ अर्ब ९७ करोड रुपैयाँ हिस्सा अलैँचीको छ ।
मूल्यका हिसाबले आयातको अन्तर धेरै फराकिलो छ । भन्सार अधिकृत अधिकारीका अनुसार नेपालले काँकडभिट्टा नाका हुँदै ४६ अर्ब ८० करोड ५३ लाख मूल्यबराबरको सामान आयात गरेको छ । त्यसमध्ये १० अर्ब ३९ करोड रुपैयाँको पेट्रोलियम पदार्थ आयात भएको छ । १ अर्ब ९७ करोड ८१ लाख रुपैयाँ मूल्यबराबरको क्लिंकर काँकडभिट्टा नाकाबाट नेपाल भित्रिएको छ । सिमेन्टमा नेपाल आत्मनिर्भर भए पनि कच्चा पदार्थ उपलब्ध नहुँदा बर्सेनि अर्बौँ रुपैयाँ क्लिंकर खरिदमा बाहिरिने गरेको हो । काँकडभिट्टा नाकाबाट ७७ करोड रुपैयाँबराबरको सेटअप बक्स भित्रिएको छ ।
यस नाकाबाट १३ अर्बको कोइला नेपाल भित्रिएको भन्सारको तथ्यांक छ । ६५ करोड रुपैयाँबराबरको जुस नेपाल भित्रिएको छ । बंगलादेशबाट नेपाल भित्रिने जुसको आयात पनि अघिल्ला वर्षभन्दा गत आवमा घटेको भन्सार अधिकृत भरतराज अधिकारीले बताए ।
‘लक्ष्यभन्दा बढी नै राजस्व उठाउने हाम्रो लक्ष्य थियो,’ उनले भने, ‘हाम्रा लागि दुर्भाग्य भयो कि, बंगलादेशबाट आउने जुस र भारतबाट आउने क्लिंकरको परिमाणमा कमी आयो ।’ सरकारले मेची भन्सारलाई गत आवमा ११ अर्ब ८२ करोड ६१ लाख रुपैयाँ राजस्व संकलन गर्ने लक्ष्य दिएको थियो । कार्यालयले १० अर्ब ९ करोड ९५ लाख रुपैयाँ राजस्व संकलन गर्न सक्षम भएको थियो ।
यस नाकाबाट २ अर्ब ९४ करोड २८ लाख रुपैयाँको चिया निर्यात भएको छ । चियापछि १ अर्ब २४ करोडको मुसुरो दाल निर्यात भएको भन्सारको तथ्यांक छ । काँकडभिट्टा नाकाबाट १ अर्ब २४ करोडको कर्कटपाता निर्यात भएको छ ।, समाचार नयाँ पत्रिका दैनिकमा प्रकाशित छ ।
