काठमाडौं । त्रिभुवन अन्तर्राष्ट्रिय विमानस्थलको आन्तरिक टर्मिनल भवनमा विदेशी मुद्रा विनिमय खरिद सेवा सञ्चालनका लागि बोलपत्र आह्वान गरिएको छ।
नेपाल नागरिक उड्डयन प्राधिकरणअन्तर्गत त्रिभुवन अन्तर्राष्ट्रिय विमानस्थल नागरिक उड्डयन कार्यालय, गौचरले दोस्रो पटक सार्वजनिक सूचना जारी गर्दै आन्तरिक टर्मिनल भवनको प्रस्थानतर्फ रहेको पुरानो स्टेरायल हलमा खाली रहेको १६.९६ वर्गमिटरको सटरमा विदेशी मुद्रा विनिमय खरिद सेवा सञ्चालन गर्न इच्छुक संस्था, फर्म तथा कम्पनीबाट बोलपत्र माग गरेको हो।
प्राधिकरणका अनुसार सम्बन्धित निकायबाट विदेशी मुद्रा विनिमयसम्बन्धी कारोबार सञ्चालन गर्ने इजाजत प्राप्त संस्था तथा कम्पनीले प्रचलित कानुनबमोजिम बोलपत्र दाखिला गर्न सक्नेछन्।
बोलपत्रका लागि ५ वर्षको न्यूनतम बहाल रकम १ करोड ३९ लाख ४ हजार ६ सय १० रुपैयाँ तोकिएको छ। बोलपत्र दस्तुर ३ हजार ३९० रुपैयाँ निर्धारण गरिएको छ।
सूचनामा बोलपत्र खरिद गर्ने अन्तिम मिति सूचना प्रकाशित भएको मितिले २१औँ दिनको कार्यालय समयभित्र र बोलपत्र दर्ता गर्ने अन्तिम मिति २२औँ दिनको दिउँसो १२ बजेसम्म तोकिएको छ। बोलपत्र सोही दिन दिउँसो २ बजे खोलिनेछ।
विमानस्थल कार्यालयले बोलपत्रसम्बन्धी विस्तृत विवरण नेपाल नागरिक उड्डयन प्राधिकरणको वेबसाइट तथा त्रिभुवन अन्तर्राष्ट्रिय विमानस्थलको वेबसाइटमा उपलब्ध रहेको जनाएको छ। थप जानकारीका लागि कार्यालयको फोन नम्बर ०१–४११३०३३, एक्सटेन्सन २४९७ मा सम्पर्क गर्न सकिनेछ।
बोलपत्र आह्वानसम्बन्धी दोस्रो सूचना २०८३ साल असोज १ गते प्रकाशित गरिएको हो।
