काठमाडौं । काठमाडौं उपत्यकाबाट विभिन्न मितिमा हराएका ५० वटा दुईपाङ्ग्रे सवारी साधन ट्राफिक प्रहरीले खोजी गरी सम्बन्धित धनीलाई हस्तान्तरण गरेको छ ।
मंगलबार काठमाडौं उपत्यका ट्राफिक प्रहरी कार्यालयमा आयोजित कार्यक्रममा कार्यालयका प्रहरी वरिष्ठ उपरीक्षक सुरेशप्रसाद काफ्लेले खोजी गरी फेला पारिएका ५० वटा मोटरसाइकल तथा स्कुटर सम्बन्धित धनीलाई हस्तान्तरण गर्नुभएको हो ।
काठमाडौं उपत्यका ट्राफिक प्रहरी कार्यालयमा परेको निवेदनका आधारमा खोजी गर्ने क्रममा ती सवारी साधन फेला पारिएको प्रहरीले जनाएको छ । केही सवारी साधनमा वास्तविक नम्बर प्लेट र केहीमा नक्कली नम्बर प्लेट प्रयोग गरिएको अवस्थामा फेला पारिएको थियो ।
सवारी साधन हस्तान्तरण गर्दै प्रहरी वरिष्ठ उपरीक्षक काफ्लेले सम्भव भएसम्म आफ्ना सवारी साधनमा जीपीएस प्रणाली जडान गर्न आग्रह गर्नुभयो । जीपीएस जडान गरिएको अवस्थामा सवारी साधनको अवस्थिति पत्ता लगाउन र चोरी भएमा खोजी गर्न सहज हुने उहाँले बताउनुभयो ।
उहाँका अनुसार गत २८ भदौ राति करिब १ बजे हराएको एउटा मोटरसाइकलमा जडान गरिएको सानो जीपीएसका कारण केही घण्टामै सवारी साधन फेला पार्न र चोरीमा संलग्न व्यक्तिलाई समेत पक्राउ गर्न प्रहरी सफल भएको थियो ।
काफ्लेले भन्नुभयो, “त्यो बाइकमा सानो जीपीएस राखिएको हुनाले खोज्न सहज भयो । त्यसकारण सकेसम्म आफ्नो बाइकमा सानो जीपीएस अथवा सुरक्षाका अन्य उपाय अपनाउन आग्रह गर्दछु ।”
उहाँले मोटरसाइकल तथा स्कुटर पार्किङ गर्दा सुरक्षित र सहज स्थान छनोट गर्नसमेत सर्वसाधारणलाई आग्रह गर्नुभयो । सुरक्षित स्थानमा पार्किङ गर्ने र सवारी साधनको सुरक्षाका लागि आवश्यक सावधानी अपनाउने हो भने चोरीका घटना न्यूनीकरण गर्न सकिने उहाँको भनाइ थियो ।
