काठमाडौं। राष्ट्रिय प्रजातन्त्र पार्टी (राप्रपा)की प्रमुख सचेतक खुश्बु ओलीले रसुवाको भोटेकोशी बाढीमा परी मृत्यु भएकामध्ये पहिचान भइसकेका शव तत्काल सम्बन्धित परिवारलाई हस्तान्तरण गर्न सरकारसँग माग गर्नुभएको छ।
प्रतिनिधि सभाको मंगलबारको बैठकमा बोल्दै ओलीले पूर्ण रूपमा पहिचान भइसकेका र परिवारले दाबी गरेका शवसमेत सरकारले हस्तान्तरण नगरेको भन्दै पीडित परिवारबाट गुनासो आइरहेको बताउनुभयो।
उहाँले डीएनए परीक्षणको रिपोर्ट आउन ढिलाइ हुँदा पीडित परिवारले थप पीडा भोग्नुपरेको बताउनुभयो। उहाँका अनुसार डीएनए परीक्षणका लागि प्रहरी अस्पतालमा रगतको नमुना दिएको १५ दिन बितिसक्दा पनि रिपोर्ट प्राप्त भएको छैन।
सबै शवको डीएनए रिपोर्ट एकैपटक निकाल्ने तयारी गरिएकाले समय लाग्ने जानकारी पीडित परिवारले पाएको भन्दै ओलीले त्यसप्रति आपत्ति जनाउनुभयो। अन्तर्राष्ट्रियस्तरमा समेत जवाफ दिनुपर्ने भएकाले डीएनए परीक्षणमा तीन–चार महिनासम्म लाग्न सक्ने भनिएको पीडितको गुनासो रहेको उहाँले उल्लेख गर्नुभयो।
“अनुहारसहित स्पष्ट रूपमा शव पहिचान भएको र परिवारले दाबी गरेको अवस्थामा सम्बन्धित परिवारलाई शव जिम्मा दिनुपर्छ,” ओलीले भन्नुभयो, “डीएनए परीक्षण अनिवार्य नै गर्नुपर्ने हो भने पनि छिटो रिपोर्ट आउने व्यवस्था गर्नुपर्छ।”
उहाँले लामो समयसम्म शव कुर्नुपर्दा पीडित परिवारको पीडा थप बढ्ने भन्दै यस विषयमा राज्य संवेदनशील हुनुपर्ने बताउनुभयो। पूर्ण रूपमा पहिचान भएका शवको सनाखत गरी तत्काल परिवारलाई हस्तान्तरण गर्न उहाँले सरकारको ध्यानाकर्षण गराउनुभयो।
