काठमाडौं । भोटेकोशी बाढीका कारण क्षतिग्रस्त पृथ्वी राजमार्गको कृष्णभीर खण्डमा सडक विभागले असोज १ गतेदेखि सबै प्रकारका सवारीसाधनका लागि दुईतर्फी यातायात सञ्चालन गर्ने तयारी गरेको छ ।
सडक विभागको योजना तथा अनुगमन महाशाखाका उपमहानिर्देशक शुभराज न्यौपानेका अनुसार कृष्णभीरमा सडक खोल्ने कामको परीक्षण सफल भएको छ । तर सडकमा ग्राभेल बिछ्याउने, सतहगत निकास (सब–सर्फेस ड्रेनेज) निर्माण गर्ने तथा सक्रिय पहिरो क्षेत्रमा पानी निकासका लागि फ्रेन्च ड्रेन र होरिजोन्टल ड्रिलिङको काम भने अझै बाँकी छ ।
भदौ १० गते आएको भोटेकोशी बाढीका कारण पृथ्वी राजमार्गका विभिन्न खण्डमा क्षति पुगेको थियो । त्यसपछि भदौ १४ गते आएको अर्को बाढीले नदी कटान बढाउँदा परेवाभीर, कृष्णभीरलगायत क्षेत्रमा सडकको तल्लो भाग बगाएको थियो ।
कृष्णभीर पुरानो पहिरो सक्रिय हुने क्षेत्रसमेत भएकाले सडक विभागले प्राविधिक विज्ञ तथा नेपाल जियोटेक्निकल सोसाइटीसँग परामर्श गरेर तत्काल यातायात सञ्चालन गर्ने निर्णय गरेको न्यौपानेले बताउनुभयो । पहिरोतर्फबाट सडक खन्दै सुरुमा एक लेनको ट्र्याक खोल्ने र त्यसलाई विस्तार गर्दै दुईतर्फी यातायात सञ्चालन गर्ने गरी काम अघि बढाइएको उहाँले जानकारी दिनुभयो ।
आइतबार गरिएको परीक्षणका क्रममा कृष्णभीरमा ट्र्याक खोलेर ग्यास बुलेटहरू पार गराउँदै सडकको परीक्षण गरिएको थियो । परीक्षण सफल भए पनि ग्राभेल बिछ्याउने र पानी निकासको काम बाँकी रहेकाले तत्कालका लागि सडक सञ्चालन रोकिएको विभागले जनाएको छ ।
बाँकी काम पूरा भएपछि असोज १ गतेदेखि कृष्णभीरमा दुईतर्फी यातायात सञ्चालन गर्ने तयारी रहेको न्यौपानेले बताउनुभयो । यद्यपि माथिबाट पहिरो खस्ने वा अन्य प्राविधिक समस्या देखिएमा सडकको अवस्था हेरेर यातायात सञ्चालनसम्बन्धी निर्णय गरिने उहाँको भनाइ छ ।
सक्रिय पहिरो क्षेत्रमा पानी जम्न नदिन फ्रेन्च ड्रेन तथा होरिजोन्टल ड्रिलिङमार्फत निकासको व्यवस्था गरिने विभागले जनाएको छ । बाढीका कारण नदीको सतह बढ्नुका साथै नदी कटानले पृथ्वी राजमार्गका विभिन्न स्थानमा सडकको तल्लो भागमा क्षति पुगेको विभागको भनाइ छ ।
भोटेकोशी बाढीको प्रभाव पृथ्वी राजमार्ग हुँदै त्रिशूली र नारायणी क्षेत्रसम्म परेको भन्दै सडक विभागले यात्रुलाई सावधानी अपनाउन आग्रह गरेको छ । विपद्को समयमा अत्यावश्यक कामबाहेक यात्रा नगर्न र यात्रा गर्नैपर्ने भए सडकको अवस्था बुझेर मात्र अघि बढ्न उपमहानिर्देशक न्यौपानेले आग्रह गर्नुभएको छ ।
बाढी तथा वर्षाको अवस्था सामान्य भएपछि पृथ्वी राजमार्गको विस्तृत प्राविधिक मूल्याङ्कन गरी आवश्यक सुधार, मर्मत तथा पुनर्निर्माणका दीर्घकालीन काम अघि बढाइने विभागले जनाएको छ ।
