काठमाडौं । आज बिहान काठमाडौं महानगरपालिका–८ गौशालास्थित भण्डारखालको जङ्गलमा दुई जनाको शव फेला परेको छ ।
खोटाङको दित्तेल रुपाकोट मझुवागढी नगरपालिका–१० घर भई काठमाडौँको बाँसबारी बस्दै आएका ४० वर्षीय जय गिरी र खोटाङको टेम्मा गाउँ बस्ने ३३ वर्षीया उमिता दमाइँको रुखमा झुण्डिएको अवस्थामा शव फेला परेको महानगरीय प्रहरी वृत्त गौशालाका प्रहरी निरीक्षक खेम राउतले जानकारी दिए ।
घटनास्थलको प्रकृति मुचुल्का उठाई दुवै शव परीक्षणका लागि महाराजगञ्जस्थित शिक्षण अस्पतालमा लगिएको उनले जानकारी दिए । खोटाङ बस्दै आएकी दमाइँ काठमाडौं आएको कारण भने खुलेको छैन । उनी काठमाडौंमा दिदी–भिनाजु कहाँ बसेको पाइएको प्रहरीले जनाएको छ ।
