काठमाडौं । चीनका विदेशमन्त्री एवं स्टेट काउन्सिलर वाङ यी तीनदिने औपचारिक भ्रमणका क्रममा आइतबार (आज) साँझ काठमाडौं आउँदै छन् । नेपाल भ्रमणको सिलसिलामा चिनियाँ विदेशमन्त्री यीले राष्ट्रपति विद्यादेवी भण्डारी, प्रधानमन्त्री केपी ओली र परराष्ट्रमन्त्री प्रदीप ज्ञवालीसँग सोमबार भेटवार्ता गर्ने कार्यक्रम तय भएको परराष्ट्र मन्त्रालयले जनाएको छ ।
‘उहाँ आइतबार साँझ नेपाल आइपुग्नुहुनेछ, परराष्ट्र मन्त्रालयका प्रवक्ता भरतराज पौड्यालले नयाँ पत्रिकासँग भने, ‘भ्रमणको सिलसिलामा राष्ट्रपति, प्रधानमन्त्री र परराष्ट्रमन्त्रीसँग शिष्टाचार भेटवार्ताको मुख्य कार्यक्रम तय भएको छ ।’ चीन र नेपालका परराष्ट्र मन्त्रालयले शुक्रबार एकैसाथ भ्रमणबारे कार्यतालिका सार्वजनिक गरेका थिए ।
चिनियाँ विदेश मन्त्रालयका प्रवक्ता कन सुहाङले नियमित पत्रकार सम्मेलनमा यीले पाकिस्तान र नेपाल भ्रमण गर्न लागेको घोषणा गरेका थिए । शनिबार पाकिस्तान भ्रमणमा गएका विदेशमन्त्री यी इस्लामावादबाट आइतबार साँझ सीधै काठमाडौं ओर्लिनेछन् ।
दक्षिणी छिमेकी भारतका विदेशमन्त्री नेपाल भ्रमण आएको तीन साता नपुग्दै उत्तरी छिमेकी चीनका विदेशमन्त्री नेपाल आउन लागेका हुन् । दुई साताअघि ४ भदौमा भारतीय विदेशमन्त्री सुब्रमण्यम् जयशंकरले पनि नेपाल भ्रमण गरेका थिए । उनी दुई देश (नेपाल–भारत)का परराष्ट्रमन्त्रीस्तरीय आयोगको बैठकमा सहभागी भएका थिए ।
नेपालका समकक्षी ज्ञवालीसँग सोमबार भेटवार्ता
परराष्ट्रमन्त्री प्रदीप ज्ञवाली र चिनियाँ समकक्षी यीबीच सोमबार द्विपक्षीय औपचारिक वार्ता हुने कार्यक्रम रहेको परराष्ट्र मन्त्रालयले जनाएको छ । औपचारिक वार्तामा नेपाल र चीनबीच सबै पक्षमा छलफल हुनेछ । नेपालले चिनियाँ राष्ट्रपति सी जिनपिङको नेपाल भ्रमणमा पुनः जोड दिनेछ । नेपाल र चीनबीच यसैबीचमा भएका सहमति र सम्झौता कार्यान्वयनका उपायबारे पनि छलफल हुने परराष्ट्र स्रोतले बतायो । विशेष गरी सिगात्से–केरुङ–काठमाडौं रेलमार्गको सम्भाव्यता अध्ययन, डिपिआर तयारीका लागि छलफल हुनेछ ।
चिनियाँ विदेशमन्त्रीको नेपाल भ्रमणलाई चीनबाट भविष्यमा हुने उच्चस्तरीय भ्रमणको तयारीका रूपमा पनि लिइएको छ । अनुभवी करिअर डिप्लोम्याट मानिने यी नेपालबारे लामो समयदेखि जानकार छन् । उनी मंगलबार बिहान स्वदेश फर्किने कार्यक्रम छ ।
सम्मानमा सोमबार रात्रिभोज
परराष्ट्रमन्त्री ज्ञवालीले समकक्षी यीको सम्मानमा सोमबार साँझ रात्रिभोजको आयोजना गर्ने कार्यक्रम रहेको परराष्ट्र मन्त्रालयले जनाएको छ । रात्रिभोजमा परराष्ट्र मन्त्रालयका उच्च अधिकारीहरू, दुवैतर्फका कूटनीतिक नियोगका प्रमुखहरूसहितका अधिकारी सहभागी हुने जनाइएको छ ।
परराष्ट्रमन्त्री ज्ञवाली भन्छन्–चिनियाँ राष्ट्रपति आउनेमा आशावादी छौँ
परराष्ट्रमन्त्रीस्तरीय बैठकमा आर्थिक र विकास साझेदारीमा छलफल हुने
परराष्ट्रमन्त्री प्रदीप ज्ञवालीले चिनियाँ राष्ट्रपति सी जिनपिङ नेपाल भ्रमणमा आउनेमा आफू आशावादी भएको बताएका छन् । भ्रमण मिति तय नभइसके पनि चीनको उच्चस्तरीय नेतृत्वको नेपाल आगमनलाई परराष्ट्रमन्त्री ज्ञवालीले ‘उत्साहको विषय’का रूपमा अर्थ्याए ।
नेपाल र चीनबीच भोलि (सोमबार) दुवै देशका परराष्ट्रमन्त्रीको नेतृत्वमा राजधानीमा हुने प्रतिनिधिमण्डलस्तरीय भेटवार्तालाई चिनियाँ राष्ट्रपतिको नेपाल आगमनको पूर्वतयारीका रूपमा पनि विश्लेषण गरिएको छ । परराष्ट्रमन्त्री ज्ञवालीले भने सोमबारको बैठक आर्थिक र विकास साझेदारीमा केन्द्रित हुने बताए ।
चिनियाँ विदेशमन्त्री वाङ यीको सोमबारदेखि हुने नेपालको औपचारिक भ्रमण र द्विदेशीय प्रतिनिधिमण्डलस्तरीय वार्तामा नेपाल–चीन सम्बन्धका समग्र पक्षका साथै पारस्परिक हित र चासोका सबै विषयमा विचार–विमर्श हुने ज्ञवालीले जानकारी दिए । उनले दुई देशबीच विगतमा भएका सन्धि–सम्झौता तथा नेपालमा सञ्चालित विकास–निर्माणका परियोजनाको समीक्षाका साथै तिनको द्रुत कार्यान्वयनमा जोड दिइने पनि दाबी गरे ।
चीन र नेपालबीच हिमालय सीमापार बहुआयामिक सम्पर्क सञ्जाल निर्माण गर्न भएका समझदारी, रेलमार्ग निर्माण तथा परस्परमा सम्पर्क विस्तार र दुई देशबीच भएको यातायात तथा पारवहन सम्झौतालगायत विषयमा केन्द्रित रहेर वार्ता हुने मन्त्री ज्ञवालीले बताए । चार वर्षपछि चिनियाँ विदेशमन्त्रीबाट नेपाल भ्रमण हुन लागेको हो । विदेशमन्त्री वाङ चीनको राज्य परिषद्को सदस्यसमेत हुन् ।
चीनको भौतिक एवं आर्थिक विकासबाट नेपाल कसरी लाभान्वित हुन सक्छ भन्नेमा नेपालको ध्यान केन्द्रित रहेको उल्लेख गर्दै उनले वार्तामा द्विपक्षीय हित, क्षेत्रीय र अन्तर्राष्ट्रिय चासोका विविध विषयमा पनि विचार–विमर्श हुने बताए ।
चिनियाँ राष्ट्रपतिको नेपाल भ्रमण सम्बन्धमा मन्त्री ज्ञवालीले भने, ‘उहाँ (सी) ले भ्रमण गर्न यो उपयुक्त समय हो भन्ने हामीले जानकारी गराएका छौँ । चीनको उच्चस्तरीय नेतृत्वको आगमन हाम्रा लागि उत्साहको विषय हो, तर भ्रमणको मिति निर्धारण भएको छैन ।’ चिनियाँ राष्ट्रपतिले उपयुक्त समयमा भ्रमण गर्नेमा आफू आशावादी रहेको परराष्ट्रमन्त्रीले बताए । यसअघि राष्ट्रपति विद्या भण्डारीले चीन भ्रमणमा जाँदा चिनियाँ समकक्षीलाई नेपाल भ्रमणको निमन्त्रणा दिएकी थिइन् भने राष्ट्रपति सीले सकारात्मक जवाफ दिएका थिए । , समाचार नयाँ पत्रिका दैनिकमा प्रकाशित छ ।
