काठमाडौं । रसुवाको भोटेकोशी नदीमा आएको भीषण बाढीमा परी मृत्यु हुनेको संख्या ५३८ पुगेको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरण (एनडीआरआरएमए) ले शुक्रबार दिउँसो ३ बजेसम्म विभिन्न जिल्लाबाट प्राप्त विवरणअनुसार ५३८ जनाको शव फेला परेको जनाएको हो ।
प्राधिकरणका अनुसार रसुवामा १२, नुवाकोटमा ३७, धादिङमा ३३, गोरखामा ४६, नवलपरासी पूर्वमा १३४, नवलपरासी पश्चिममा २७, तनहुँमा २८ र चितवनमा २२१ जनाको शव फेला परेको छ । गोरखामा फेला परेका शवमा विभिन्न मानव अङ्गसमेत रहेका छन् ।
बाढीपछि हालसम्म ९७७ जना सम्पर्कविहीन रहेको विवरण सार्वजनिक गरिएको छ । सम्पर्कविहीन हुनेमा नेपाल प्रहरीका २८, नेपाली सेनाका ४५, सशस्त्र प्रहरी बल नेपालका १३, भन्सार कार्यालयका १५ र अध्यागमन कार्यालयका चार जना छन् । यस्तै, रसुवाका १६१, नुवाकोटका एक र मकवानपुरका ६६ जना सम्पर्कविहीन रहेको प्राधिकरणले जनाएको छ । सम्पर्कविहीनमध्ये ५१७ जना विदेशी नागरिक र विदेशमा बसोबास गर्ने १२७ जना नेपाली नागरिक रहेका छन् ।
बाढीमा परी ७३ जना घाइते भएका छन् । घाइतेमध्ये रसुवाका ४३, धादिङका तीन र नुवाकोटका २७ जना छन् । बाढी प्रभावित क्षेत्रबाट हालसम्म ३ हजार ७४२ जनाको उद्धार गरिएको छ । उद्धार गरिएकामध्ये २५ जना विदेशी नागरिक रहेका छन् ।
खोज तथा उद्धारका लागि नेपाल प्रहरी, नेपाली सेना र सशस्त्र प्रहरी बल नेपालका गरी १४ हजार ८२९ सुरक्षाकर्मी परिचालन गरिएको छ । जसमा नेपाल प्रहरीका ४ हजार ४७३, नेपाली सेनाका ६ हजार ६९८ र सशस्त्र प्रहरी बलका ३ हजार ६५८ जना छन् । उद्धार तथा राहतका लागि नेपाली सेना र निजी क्षेत्रका हेलिकप्टरबाट हालसम्म ७८ वटा हवाई उडान भएका छन् ।
बाढी प्रभावित जिल्लामा राहत वितरणलाई पनि तीव्रता दिइएको छ । सरकारले रसुवालाई एक करोड, नुवाकोटलाई एक करोड र धादिङलाई ५० लाख रुपैयाँ नगद राहत उपलब्ध गराएको छ । चाउचाउ, बिस्कुट, स्लिपिङ ब्याग, म्याट्रेस र ब्ल्याङ्केटलगायत सामग्रीसहित १० ट्रक राहत सामग्री प्रभावित क्षेत्रमा पठाइएको छ । थप २० ट्रक खाद्य तथा गैरखाद्य सामग्रीसमेत पठाइएको प्राधिकरणले जनाएको छ ।
प्रभावित क्षेत्रमा सञ्चार सेवा सहज बनाउन सञ्चार सेटहरू पठाइएको छ भने हेलिकप्टरमार्फत चार वटा उडान गरी खाद्य तथा गैरखाद्य सामग्रीसमेत पुर्याइएको छ ।
बाढी प्रभावित क्षेत्रमा इन्धन अभाव हुन नदिन नुवाकोटका भैरवी, सुर्यमती र पञ्चकन्या आयल स्टोरमा ४१ हजार लिटर डिजेल र २४ हजार लिटर पेट्रोल मौज्दात रहेको प्राधिकरणले जनाएको छ । नुवाकोटमा ९ हजार लिटर हवाई इन्धनसमेत मौज्दात रहेको र थप आवश्यक परे तत्काल पठाउने व्यवस्था मिलाइएको छ ।
प्राधिकरणका अनुसार सम्पर्कविहीन विदेशी नागरिक तथा विदेशमा बस्ने नेपाली, उपचाररत व्यक्ति र हेलिकप्टरबाट उद्धार गरिएका व्यक्तिहरूको विवरण प्राधिकरणको फेसबुक पेज तथा वेबसाइटमा उपलब्ध गराइएको छ । उक्त विवरण जिल्ला प्रशासन कार्यालय, जिल्ला तथा राष्ट्रिय आपत्कालीन कार्य सञ्चालन केन्द्रबाट प्राप्त सूचनाका आधारमा तयार गरिएको प्राधिकरणले जनाएको छ ।
