काठमाडौं । नेपाल पर्वतारोहण संघले आठ हजार मिटरभन्दा अग्ला थप छ वटा हिमाललाई अन्तर्राष्ट्रिय मान्यता दिलाउने प्रक्रिया अन्तिम चरणमा पुगेको जनाएको छ ।
सगरमाथा आरोही संघको २५औँ वार्षिकोत्सवका अवसरमा आइतबार राजधानीमा आयोजित कार्यक्रममा नेपाल पर्वतारोहण संघका अध्यक्ष फुर गेल्जे शेर्पाले थप छ वटा हिमाललाई अन्तर्राष्ट्रिय मान्यता दिलाउन आवश्यक दस्तावेजीकरणको काम भइरहेको जानकारी दिनुभयो ।
उहाँका अनुसार प्रक्रिया सफल भए नेपालमा आठ हजार मिटरभन्दा अग्ला हिमालको संख्या १४ बाट बढेर २० पुग्नेछ । तीमध्ये १४ वटा हिमाल नेपालमै पर्ने उहाँले बताउनुभयो ।
अध्यक्ष शेर्पाले नेपालको पर्वतीय पर्यटन विश्वकै उत्कृष्ट गन्तव्यका रूपमा विकास भइरहेको बताउँदै यसको विकासमा सरकार, पर्वतारोहणसम्बन्धी संघसंस्था र अन्य सरोकारवालाको संयुक्त योगदान रहेको उल्लेख गर्नुभयो ।
उहाँले सगरमाथा आरोही संघ र नेपाल पर्वतारोहण संघबीच नङ र मासुको जस्तै सम्बन्ध रहेको बताउँदै नेपाल पर्वतारोहण संघ स्थापनाकालदेखि नै नेपालको पर्वतारोहण क्षेत्रको विकासमा सक्रिय रहेको दाबी गर्नुभयो । नेपाल सरकारले जारी गर्ने हिमाल तथा चुचुरोको सूची तयार पार्नसमेत संघले महत्वपूर्ण भूमिका निर्वाह गरेको उहाँको भनाइ थियो ।
शेर्पाका अनुसार नेपाल पर्वतारोहण संघले अहिले करिब एक सय वटा हिमालको प्रस्ताव तयार पारिरहेको छ । साथै, सरकारले गर्ने प्राविधिक काममा समेत संघले सहयोग गरिरहेको उहाँले बताउनुभयो ।
यसअघि पर्यटन विभागले आफ्नो पिक प्रोफाइलमा ल्होत्से सार (८,४०० मिटर) र ल्होत्से सेन्टर (८,४१० मिटर) लाई आधिकारिक रूपमा समावेश गरिसकेको छ ।
त्यसैगरी, ताप्लेजुङस्थित कञ्चनजंघा क्षेत्रमा चार वटा नयाँ शिखर पहिचान भएका छन् । तीमध्ये कञ्चनजंघा सेन्टर ८,४७३ मिटर, कञ्चनजंघा साउथ ८,४७६ मिटर, यालुङखाङ ८,५०५ मिटर र यालुङखाङ वेस्ट ८,०७७ मिटर उचाइका छन् ।
संघका अध्यक्ष शेर्पाले थप छ वटा हिमाललाई अन्तर्राष्ट्रिय मान्यता दिलाउने प्रक्रिया सफल भए नेपालको पर्वतीय पर्यटनमा थप नयाँ सम्भावना खुल्ने बताउनुभयो ।
