काठमाडौँ । नेकपाका संयोजक पुष्पकमल दाहाल ‘प्रचण्ड’ले आफ्नो वर्ग, मूल विचार र रणनीतिलाई नजरअन्दाज गर्दा पार्टी कमजोर हुँदै गएको बताएका छन्।
आइतबार काठमाडौँमा आयोजित एक कार्यक्रममा बोल्दै प्रचण्डले पछिल्लो समय पार्टी रणनीति बिर्सेर सत्ता बनाउने र ढलाउने खेलमा केन्द्रित हुनु गम्भीर भुल भएको बताए।
‘हामी बढी कार्यनीतिमा अल्झियौँ, सत्ता समीकरण बनाउने र भत्काउने नै कामको केन्द्रबिन्दु बन्न पुग्यो,’ उनले भने, ‘हिजो जनयुद्धमा हुँदा सामन्तवादलाई परास्त गर्ने रणनीति थियो।’
रणनीतिक लक्ष्य हासिल गर्न आवश्यक कार्यनीति बनाएर अघि बढ्दा जनयुद्धमा सफलता प्राप्त भए पनि अहिले रणनीतिलाई कार्यनीति र कार्यनीतिलाई रणनीतिजस्तो बनाउँदा पार्टी अन्योलमा फसेको उनको भनाइ थियो।
प्रचण्डले पार्टीको जनतासँगको सम्बन्धसमेत कमजोर हुँदै गएको स्वीकार गरे। ‘किताबमा लेखे पनि र भाषणमा बोले पनि हाम्रो जनतासँगको सम्बन्ध कमजोर हुँदै गयो, यही हाम्रो मुख्य त्रुटि भयो,’ उनले भने।
उनले आफ्नो पक्षले कार्यनीतिलाई अत्यधिक प्राथमिकता दिइरहँदा विपक्षीहरू भने रणनीतिक उद्देश्यमा केन्द्रित भएको दाबी गरे। ‘तर हाम्रो बैरी भने कार्यनीति छाडेर रणनीतिमा केन्द्रित भयो,’ प्रचण्डले भने, ‘उनीहरू कसरी नेपालबाट कम्युनिस्टलाई सखाप पार्ने भन्नेमा केन्द्रित भए।’
उनले पार्टीले विगतका कमजोरीबाट पाठ सिक्दै आफ्नो मूल विचार, वर्गीय आधार र रणनीतिक लक्ष्यमा पुनः केन्द्रित हुनुपर्ने संकेत गरे।
