काठमाडाैँ । लामो समयसम्म मोबाइल फोनमा कुराकानी गर्दा कानमा पर्ने ध्वनि तथा अन्य असरका कारण श्रवण क्षमता कमजोर हुने जोखिम बढेको चिकित्सकहरूले बताएका छन्। पछिल्लो समय विभिन्न प्रकारका कानसम्बन्धी समस्या लिएर भेरी अस्पताल, नेपालगञ्जमा दैनिक करिब १५० देखि २०० जना बिरामी उपचारका लागि आउने गरेको अस्पतालका नाक, कान, घाँटी तथा टाउको रोग विभागीय प्रमुख डा. दिनेशकुमार चौधरीले जानकारी दिनुभयो।
उहाँका अनुसार मोबाइलमा लामो समय कुराकानी गर्दा कानको जालीमा असर पर्न सक्ने भएकाले श्रवण शक्ति कमजोर हुनुका साथै कान पाक्ने लगायतका समस्या देखिन सक्छन्। लामो समय मोबाइलमा कुरा गर्नुपरेमा मोबाइललाई कानभन्दा केही टाढा राखेर कुराकानी गर्न उहाँले सुझाव दिनुभयो।
“लामो समय कुरा गर्नका लागि मोबाइललाई कानभन्दा टाढा राखेर गर्नुपर्छ, नत्र त्यसले ठूलो समस्या निम्त्याउन सक्छ,” डा. चौधरीले भन्नुभयो।
गर्मी मौसममा अत्यधिक चिसो पेय पदार्थको सेवनले पनि नाक, कान र घाँटीमा समस्या देखिन सक्ने उहाँको भनाइ छ। पछिल्लो समय नाक, कान तथा घाँटीमा एलर्जीसम्बन्धी समस्या भएका बिरामीको संख्या बढ्दै गएको उहाँले बताउनुभयो।
डा. चौधरीका अनुसार रोग प्रतिरोधात्मक क्षमता कमजोर भएका व्यक्तिलाई चिसोका कारण समस्या बढी देखिने गर्छ। हाछ्युँ गर्दा नाक र कानमा पर्ने दबाबले समेत समस्या बढाउन सक्ने उहाँले बताउनुभयो। वातावरणीय प्रदूषणसँगै अत्यधिक चिसो पेय पदार्थको सेवनका कारण देखिने एलर्जीका बिरामी पनि अस्पतालमा आउने गरेको उहाँको भनाइ छ।
यसैबीच, लामो समयदेखि कान दुख्ने, कान पाक्ने, कानमा फोहोर जम्ने लगायतका समस्या भएका बिरामीका लागि बाँकेको खजुरा गाउँपालिकामा सञ्चालन गरिएको निःशुल्क कान स्वास्थ्य शिविर प्रभावकारी देखिएको छ।
खजुरा गाउँपालिकाले शनिबार आयोजना गरेको शिविरमा गाउँपालिकाका विभिन्न क्षेत्रबाट आएका ५३२ जनाको कान परीक्षण गरिएको थियो। उपचारका लागि अस्पतालसम्म पुग्न नसक्ने विपन्न समुदायलाई लक्षित गरी शिविर सञ्चालन गरिएको गाउँपालिकाले जनाएको छ।
शिविरमा गरिएको परीक्षणका क्रममा ७५ जनामा कान पाक्ने, ६१ जनामा कानेगुजी जम्ने, ३३ जनामा कानमा ढुसी देखिने र १८ जनामा कानमा मेसिन लगाउनुपर्ने समस्या पहिचान भएको स्वास्थ्यकर्मी भीषण थारुले जानकारी दिनुभयो।
थारुका अनुसार थप उपचार तथा शल्यक्रियाको आवश्यकता देखिएका २८ जनालाई थप उपचारका लागि अस्पताल पठाइएको छ।
स्वास्थ्यकर्मीहरूका अनुसार कानमा समस्या देखिए पनि सामान्य समस्या भन्दै लामो समयसम्म उपचार नगर्ने प्रवृत्तिका कारण कतिपय अवस्थामा रोग जटिल बन्ने गरेको छ। समयमै कानको परीक्षण तथा उपचार गराउन उनीहरूले सुझाव दिएका छन्।
शिविरमा स्वास्थ्यकर्मी भीषण थारु, तीर्थमान थारु, दामोदर चौधरी र सीताकुमारी चौधरीलगायतले कान परीक्षण तथा स्वास्थ्य परामर्श दिनुभएको थियो। ब्रिनोज कान स्वास्थ्य सामुदायिक सेवा, नेपालगञ्जले शिविरमा प्राविधिक सहयोग गरेको थियो।
खजुरा गाउँपालिकाले स्थानीयस्तरमै विशेषज्ञ तथा प्राविधिक स्वास्थ्य सेवाको पहुँच विस्तार गर्ने उद्देश्यले शिविर सञ्चालन गरिएको जनाएको छ।
