काठमाडौं। आन्तरिक राजस्व विभागले साउन महिनाको दोस्रो पाक्षिक करदाता प्रोत्साहन पुरस्कारअन्तर्गत १६ जना विजेतालाई जनही एक लाख रुपैयाँ र एक जनालाई बम्पर उपहार प्रदान गर्ने गरी विजेता घोषणा गरेको छ।
विभागले साउन १६ गतेदेखि ३१ गतेसम्म नियमसम्मत कारोबारमा सहभागी भएका उपभोक्तामध्येबाट पुरस्कार विजेता छनोट गरेको हो। योजनाअन्तर्गत १६ जना विजेताले जनही एक लाख रुपैयाँ नगद पुरस्कार प्राप्त गर्नेछन् भने एक जनाले बम्पर उपहारस्वरूप १० लाख रुपैयाँ पाउनेछन्।
बम्पर उपहारबापत प्राप्त हुने १० लाख रुपैयाँमा प्रचलित कानुनअनुसार २५ प्रतिशत कर लाग्नेछ।
विभागका अनुसार करदाता प्रोत्साहन पुरस्कार योजनामा पछिल्लो समय उपभोक्ताको सहभागिता उल्लेख्य रूपमा बढेको छ। नगद तथा क्यूआर कारोबारमार्फत ठूलो संख्यामा उपभोक्ता योजनामा सहभागी भएका थिए।
विभागले उपभोक्तालाई नियमित तथा नियमसम्मत कारोबारमा प्रोत्साहित गर्ने उद्देश्यले करदाता प्रोत्साहन पुरस्कार कार्यक्रम सञ्चालन गर्दै आएको छ।
