काठमाडाैँ । चितवनमा विद्यालयका सवारीसाधनको अधिकतम गति प्रतिघण्टा ४० किलोमिटरमा सीमित गरिने भएको छ। दुर्घटनाको जोखिम न्यूनीकरण गर्दै विद्यालयका सवारीसाधनलाई सुरक्षित, अनुशासित र प्रविधिमैत्री बनाउन सबै सवारीसाधनमा गति नियन्त्रण उपकरण जडान गर्नुपर्ने निर्णय गरिएको हो।
प्रमुख जिल्ला अधिकारी गणेश अर्यालको संयोजकत्वमा आइतबार जिल्ला प्रशासन कार्यालयमा बसेको सामुदायिक तथा संस्थागत विद्यालयका सवारीसाधन व्यवस्थापन, नियमन तथा दुर्घटना न्यूनीकरणसम्बन्धी सरोकारवालाको समन्वय बैठकले यस्तो निर्णय गरेको हो।
बैठकले जिल्लाभित्र विद्यार्थी बोक्ने सबै सामुदायिक तथा संस्थागत विद्यालयका सवारीसाधनको अधिकतम गति प्रतिघण्टा ४० किलोमिटर कायम गर्ने निर्णय गरेको छ। तीव्र गति सडक दुर्घटनाको प्रमुख कारणमध्ये एक रहेको अध्ययन–अनुसन्धानलाई ध्यानमा राख्दै गति सीमा निर्धारण गरिएको प्रमुख जिल्ला अधिकारी अर्यालले बताउनुभयो।
उहाँका अनुसार सबै विद्यालयका सवारीसाधनमा १५ दिनभित्र गति नियन्त्रण गर्ने उपयुक्त प्रविधि जडान गरिसक्नुपर्नेछ। उपकरण जडान भए–नभएको अनुगमन जिल्ला ट्राफिक प्रहरी कार्यालय र जिल्ला प्रहरी कार्यालय चितवनले गर्नेछन्। गति नियन्त्रण प्रविधि जडान नगरेका विद्यालयका सवारीसाधन सञ्चालनमा रोक लगाइनेछ।
बैठकले विद्यालयका सवारीचालकलाई जिम्मेवारी दिनुअघि दैनिक मादक पदार्थ सेवन (मापसे) जाँच गर्ने व्यवस्था मिलाउन पनि विद्यालयलाई निर्देशन दिएको छ। त्यसका लागि प्रत्येक विद्यालयले मापसे जाँचको अभिलेख राख्ने प्रणाली विकास गरी त्यसको विवरण जिल्ला प्रहरी कार्यालय र जिल्ला ट्राफिक प्रहरी कार्यालयलाई उपलब्ध गराउनुपर्नेछ।
त्यस्तै, विद्यालयका सवारीसाधनको नियमित यान्त्रिक परीक्षण गर्ने तथा चालक र सहचालकलाई समय–समयमा अनुशिक्षण प्रदान गर्ने निर्णय गरिएको छ। मापसे नियन्त्रणका प्रभावकारी उपाय अवलम्बन गर्नसमेत विद्यालयलाई भनिएको छ।
बैठकमा जिल्लास्थित सुरक्षा प्रमुख, शिक्षा विकास तथा समन्वय एकाइका प्रमुख, स्थानीय तहका शिक्षा शाखा प्रमुख, संस्थागत तथा सामुदायिक विद्यालयका प्रधानाध्यापक तथा प्रतिनिधि, शिक्षक, प्राविधिक कम्पनीका प्रतिनिधि, विद्यालयका चालक र शिक्षासँग सम्बन्धित सरोकारवालाको सहभागिता थियो
