काठमाडाैँ । नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीले वर्तमान सरकारको कार्यशैली र नेतृत्वको अनुभवहीनताका कारण देश बर्बादीतर्फ उन्मुख भएको आरोप लगाउनुभएको छ ।
इलाममा आयोजित लोकतान्त्रिक आदिवासी जनजाति महासंघ, नेपालको केन्द्रीय कमिटी बैठकलाई सम्बोधन गर्दै अध्यक्ष ओलीले अदूरदर्शी र अनुभवहीन शक्तिका कारण मुलुक संकटतर्फ धकेलिएको दाबी गर्नुभयो । उहाँले प्रधानमन्त्री बालेन्द्र साहप्रति लक्षित गर्दै सरकार सञ्चालनका लागि अनुभव, ज्ञान र दक्षता आवश्यक पर्ने बताउनुभयो ।
अध्यक्ष ओलीले नयाँ भनिएका राजनीतिक शक्तिसँग शासन सञ्चालन गर्ने न्यूनतम दक्षतासमेत नभएको टिप्पणी गर्नुभयो । अनुभवहीन सरकारले आफ्नो क्षमताअनुसार जे गर्न सक्थ्यो, त्यही गरिरहेको उहाँको भनाइ थियो ।
उहाँले अनुभव र ज्ञान नभएका व्यक्तिलाई राज्य सञ्चालनको जिम्मेवारी दिँदा अपेक्षित परिणाम आउन नसक्ने बताउँदै खाना पकाउन नजान्ने बच्चालाई भान्साको जिम्मेवारी दिँदा जस्तो अवस्था सिर्जना हुने टिप्पणी गर्नुभयो । शासन सञ्चालन पनि सीप, अनुभव र ज्ञानको विषय भएकाले त्यसको अभावमा देशले क्षति व्यहोर्नुपर्ने उहाँले बताउनुभयो ।
ओलीले राष्ट्रिय राजनीति र प्रशासनमा ‘उरन्ठेउला’ व्यक्तिहरूलाई जिम्मेवारी दिइएका कारण बेथिति बढेको आरोप लगाउनुभयो । सक्षम र अनुभवी नेतृत्वको अभावमा मुलुकको अवस्था बिग्रँदै गएको उहाँको दाबी थियो ।
संविधानको रक्षाको विषय उठाउँदै पूर्वप्रधानमन्त्री ओलीले वर्तमान अवस्थामा संविधानको उल्लंघन भइरहेको आरोप लगाउनुभयो । प्रतिनिधि सभा विघटन गरी असंवैधानिक ढंगले निर्वाचनको प्रक्रिया अघि बढाइएको दाबी गर्दै उहाँले प्रतिनिधि सभाको कार्यकाल बाँकी हुँदाहुँदै किन विघटन गरियो भन्ने प्रश्नको जवाफ जनताले खोज्नुपर्ने बताउनुभयो ।
उहाँले भन्नुभयो, “अनुभव र ज्ञान नभएकालाई जिम्मेवारी दिँदा यस्तै हुन्छ । शासन चलाउन पनि अनुभव, क्षमता र ज्ञान चाहिन्छ । जानेकाले गर्ने ठाउँमा अनुभवहीन व्यक्तिलाई जिम्मेवारी दिँदा देश बर्बाद हुने अवस्था आउँछ ।”
अध्यक्ष ओलीले संविधानलाई सही बाटोमा फर्काउनुपर्नेमा जोड दिँदै मुलुकको हितका लागि सक्षम र अनुभवी नेतृत्वको विकल्प नरहेको बताउनुभयो । उहाँले संविधानको रक्षा र देशको विकासका लागि सचेत भएर भूमिका निर्वाह गर्न पार्टीका कार्यकर्तालाई निर्देशनसमेत दिनुभयो ।
