काठमाडाैँ । युवा, श्रम तथा रोजगारमन्त्री रामजी यादवले नेपालको श्रमबजारलाई युवामैत्री, आकर्षक र मर्यादित बनाउन सरकारले गम्भीर रूपमा काम गर्नुपर्ने बताउनुभएको छ ।
विराटनगर महानगरपालिका–३ मदनगरमा नवनिर्मित श्रम तथा रोजगार कार्यालय भवनको आज उद्घाटन गर्दै मन्त्री यादवले स्वदेशमै रोजगारीका अवसर सिर्जना गरी रोजगारीलाई मर्यादित, सुरक्षित र सम्मानजनक बनाउन आवश्यक रहेको बताउनुभयो ।
उहाँले सरकारले ‘रोजगार प्रवर्द्धन दशक’ घोषणा गरेको उल्लेख गर्दै त्यसअनुरूप स्वदेशमै पर्याप्त रोजगारीका अवसर सिर्जना गरी युवा जनशक्तिलाई राष्ट्र निर्माणमा जोड्ने लक्ष्य लिएको बताउनुभयो ।
मन्त्री यादवले नेपालको श्रमबजारलाई युवामैत्री बनाउन सरकारले विशेष पहल गरिरहेको जानकारी दिनुभयो । बदलिँदो श्रमबजारको माग र श्रमिकका आकाङ्क्षालाई सम्बोधन गर्ने गरी पहिलोपटक श्रमनीति निर्माणको काम अघि बढाइएको उहाँले बताउनुभयो ।
उहाँका अनुसार रोजगारीका अवसर, आवश्यक योग्यता तथा सीप र श्रमबजारको मागसम्बन्धी सूचनालाई एकीकृत गरी रोजगारदाता तथा रोजगारीको खोजीमा रहेका व्यक्तिबीच अर्थपूर्ण संवाद गराउने उद्देश्यले ‘श्रम संसार’ प्रणालीको स्तरोन्नति गरिएको छ ।
कार्यक्रममा मन्त्रालयका सचिव डा. दीपक काफ्लेले श्रमिकको अधिकार संरक्षणका लागि सरकारले निरन्तर प्रयास गरिरहेको बताउनुभयो ।
मोरङका प्रमुख जिल्ला अधिकारी युवराज कट्टेलले श्रम तथा रोजगार कार्यालयबाट सम्पादन हुने सेवा तथा कार्यलाई गुणस्तरीय र चुस्त बनाउनुपर्नेमा जोड दिनुभयो ।
श्रम तथा रोजगार कार्यालयका प्रमुख निरजकुमार देवले नवनिर्मित कार्यालय भवन रु पाँच करोड ३६ लाखको लागतमा निर्माण भएको जानकारी दिनुभयो ।
