काठमाडाैँ । नेपाली काँग्रेसका सचेतक निश्कल राईले वर्तमान राजनीतिक अभ्यासलाई थप मर्यादित र जिम्मेवार बनाउनुपर्ने बताउनुभएको छ । काठमाडौंमा बुधवार आयोजित एक कार्यक्रममा बोल्दै सचेतक राईले पछिल्ला कतिपय राजनीतिक घटनाक्रमले समाजमा सकारात्मक सन्देश प्रवाह नगरेको भन्दै राजनीतिक संस्कारमा सुधार ल्याउनुपर्ने बताउनु भयो ।
सचेतक राईले फरक पुस्ताका फरक राजनीतिक चुनौती हुने उल्लेख गर्दै वर्तमान पुस्ताले आफ्ना जिम्मेवारीलाई गम्भीरतापूर्वक आत्मसात गर्नुपर्ने बताउनु भयो । उहाँले राजनीतिक उपलब्धिहरूलाई नागरिकको जीवनस्तरसँग जोड्नु नै अहिलेको साझा लक्ष्य र अवधारणा हुनुपर्नेमा जोड दिनुभयो ।
उहाँले भन्नुभयो, ‘ संसदीय अभ्यासलाई अझै धेरै मर्यादित बनाउनुपर्ने अवस्था आएको छ । हिजैमात्रको एउटा घटनाले पनि त्यति राम्रो सन्देश हामीलाई दिएको छैन । त्यसले गर्दाखेरी हाम्रो यो हरेक पुस्ताको फरक राजनीतिकको राजनीतिक प्रश्नको सामना हामीले पनि गर्नुपर्नेछ । अघिल्लो पुस्ताहरुले लोकतन्त्रको लागि, राजनीतिक अधिकारको लागि संवैधानिक अन्य कुराहरुको लागि हिजो संघर्ष गर्दै आए तर आज हाम्रो पुस्ताले ती सबै उपलब्धिहरुलाई हामीले लगभग लगभग विरासत मै पाएको जस्तो पनि छौँ र हाम्रो पुस्ताले त्यो परिणामहरुलाई जनताको नागरिकको तपाईंको जीवनमा कसरी लान सकिन्छ भन्ने कुराको छ र त्यसका लागि हामी सबै एक ठाउँमा छौँ त्यो त साझा अवधारणा पनि हो जस्तो लाग्छ मलाई ।’
राजनीतिलाई जनमुखी र परिणाममुखी बनाउन सबै पक्ष एकै ठाउँमा उभिनुपर्ने उहाँको भनाइ छ । उहाँले विगतका कमजोरीहरूबाट पाठ सिक्दै राजनीतिक मर्यादा कायम राख्न सबैलाई आग्रह समेत गर्नुभयो ।
