काठमाडौं । नेपाली कांग्रेसका पूर्वसभापति शेरबहादुर देउवा समूहले साउन २९ देखि ३१ गतेसम्म काठमाडौंको सुकेधारास्थित मिराकल पार्टी प्यालेसमा राष्ट्रिय भेला आयोजना गर्ने भएको छ।
भेला आयोजक समितिका संयोजक डा. शशांक कोइरालाको सभापतित्वमा हुने बताइएको छ। भेलाको प्रमुख अतिथिका रूपमा पूर्वसभापति देउवालाई आमन्त्रण गरिएको छ। आयोजकका अनुसार देउवाले शुक्रबार दिउँसो १ बजे भेलाको उद्घाटन गर्नेछन्।
भेलाको पहिलो दिन उद्घाटन समारोहसँगै कांग्रेसका शीर्ष नेताहरूले सम्बोधन गर्ने कार्यक्रम रहेको छ। त्यसपछि शनिबार र आइतबार दुई दिन बन्दसत्र सञ्चालन हुनेछ।
आयोजकका अनुसार भेलामा करिब ४ हजार ६ सय नेता–कार्यकर्ता सहभागी हुने अपेक्षा गरिएको छ। सहभागीको संख्या ५ हजारभन्दा बढी पुग्न सक्ने अनुमानसमेत गरिएको छ।
भेलामा प्रस्तुत गरिने विभिन्न प्रतिवेदनको तयारी अन्तिम चरणमा पुगेको आयोजक समितिले जनाएको छ। प्रतिवेदनलाई बिहीबार साँझसम्म अन्तिम रूप दिएर सञ्चारमाध्यमलाई उपलब्ध गराउने तयारी भइरहेको बताइएको छ।
