काठमाडौं । अर्थमन्त्री डा. स्वर्णिम वाग्लेले आज नेपालका २० वाणिज्य बैंकका प्रमुख कार्यकारी अधिकृत (सिइयो)हरूसँग छलफल गर्ने भएका छन्।
अर्थ मन्त्रालयका अनुसार बजेटमार्फत घोषणा गरिएका आर्थिक सुधारका कार्यक्रमहरूको प्रभावकारी कार्यान्वयन, वित्तीय क्षेत्रको वर्तमान अवस्था तथा अर्थतन्त्रलाई चलायमान बनाउन बैंकिङ क्षेत्रले खेल्न सक्ने भूमिकाबारे छलफल गर्न सिइयोहरूलाई मन्त्रालयमा बोलाइएको हो।
दिउँसो ३ बजे अर्थ मन्त्रालयमा हुने उक्त छलफलमा नेपाल राष्ट्र बैंकले ‘क’ वर्गमा सूचीकृत २० वाणिज्य बैंकका प्रमुख कार्यकारी अधिकृतहरूको सहभागिता रहनेछ।
छलफलमा निजी क्षेत्रको लगानी विस्तार, कर्जा प्रवाह, वित्तीय बजारमा देखिएका चुनौती तथा बैंकिङ क्षेत्रसँग सम्बन्धित समसामयिक विषयमा समेत विचार–विमर्श हुने जनाइएको छ। सरकारले बजेटमा घोषणा गरेका आर्थिक सुधारका कार्यक्रमलाई प्रभावकारी रूपमा कार्यान्वयन गर्न बैंकिङ क्षेत्रसँग समन्वय र सहकार्यलाई प्राथमिकता दिइएको मन्त्रालयले जनाएको छ।
