काठमाडौँ। हर्मोज जलसन्धीमा जहाजहरूको सुरक्षित आवतजावत सुनिश्चित गर्न इरान र ओमानबीच एक अस्थायी मार्ग निर्धारण गर्ने विषयमा वार्ता भइरहेको इरानी विदेश मन्त्रालयले जनाएको छ ।
इरानी विदेश मन्त्रालयका प्रवक्ता इस्माइल बाघेईले सोमवार तेहरानमा आयोजित साप्ताहिक पत्रकार सम्मेलनमा ओमान र इरानबीच यससहितका विभिन्न प्राविधिक पक्षमा छलफल भइरहेको जानकारी दिनुभयो ।
उहाँकाअनुसार ओमानको जलक्षेत्रबाट जाने दक्षिणी मार्ग र इरानको क्षेत्रीय जलक्षेत्रबाट जाने उत्तरी मार्गलाई एउटा साझा मध्यवर्ती मार्गका रूपमा विकास गर्ने अवधारणामा वार्ता केन्द्रित छ ।
प्रवक्ता बाघेईले यो मार्ग दुई वा तीनवटा अलग मार्ग नभई राउण्ड–ट्रिप कोरिडोर हुने र स्थायी मार्गको टुङ्गो नलागेसम्म यसलाई अस्थायी रूपमा प्रयोग गरिने स्पष्ट पार्नुभयो ।
जलमार्गमा देखिएको असहजता इरान र ओमानबीचको समस्या नभई इरानविरुद्ध अमेरिका र इजरायलको सैनिक आक्रामकताको परिणाम भएको बाघेईको दाबी छ । उनले अमेरिकाले आफ्ना दुर्भावनापूर्ण गतिविधिहरू बन्द नगरेसम्म जलसङ्धिको अवस्थामा परिवर्तन नआउने चेतावनी समेत दिनुभयो ।
यसैगरी, इरानी विदेशमन्त्री सैयद अब्बास अराक्चीले आईतवार तेहरानमा आयोजित मन्त्रिपरिषद् बैठकमा ओमानसँगको वार्ता अन्तिम चरणमा पुगेको बताउनुभएको थियो । आधिकारिक समाचार एजेन्सी इर्नाकाअनुसार इरान यो सम्झौतामार्फत क्षेत्रीय ढुवानीलाई थप व्यवस्थित बनाउन चाहन्छ ।
पत्रकार सम्मेलनकै क्रममा बाघेईले इरानी जहाजमाथि भएको आक्रमणका लागि युक्रेनलाई जवाफदेही बनाउन इरानले आवश्यक कदम चाल्ने बताउनु भयो । गत जुलाई २५ मा युक्रेनी राष्ट्रपति भोलोडिमिर जेलेन्स्कीले क्यास्पियन सागरमा इरानसँग सम्बन्धित सैन्य सामग्री ढुवानी गर्ने जहाजहरूमा आफ्ना सेनाले आक्रमण गरेको दाबी गर्नुभएको थियो ।
इरानी भूमिमा अमेरिका र इजरायलले संयुक्त आक्रमण गरेपछि, गत फेब्रुअरी २८ देखि इरानले हर्मोज जलसङ्धिमा इजरायल र अमेरिकासँग आवद्ध जहाजहरूको आवतजावतमा रोक लगाउँदै निगरानी कडा पारेको छ
। यसैबीच, अमेरिकी सेनाले व्यापारिक ढुवानीमा इरानी खतरा कम गर्ने भन्दै इरानी सैन्य लक्ष्यहरूमा श्रृङ्खलावद्ध आक्रमण गरेको छ भने इरानले पनि यस क्षेत्रका अमेरिकी सैन्य आधारहरूमा मिसाइल र ड्रोनमार्फत जवाफी प्रहार गर्दै आएको छ । सिन्ह्वा/न्युज एजेन्सी नेपाल
