काठमाडाैँ । नेपाली कांग्रेस केन्द्रीय नीति, अनुसन्धान तथा प्रशिक्षण प्रतिष्ठानको आयोजनामा काठमाडौंमा तीन दिने विपद् व्यवस्थापनसम्बन्धी विशेष प्रशिक्षण हुने भएको छ।
प्रतिष्ठानको श्रावण १० र ११ गते बसेको छैटौँ बैठकले प्राकृतिक विपद् व्यवस्थापनसम्बन्धी आन्तरिक विशेष प्रशिक्षण आयोजना गर्ने निर्णय गरेअनुसार यही श्रावण १५, १६ र १७ गते प्रशिक्षण सञ्चालन हुन लागेको हो।
प्रशिक्षणमा इच्छुकमध्ये छनोट भएका ४० जना युवा पहिलो चरणमा सहभागी हुनेछन्। सहभागीलाई विपद् व्यवस्थापनसम्बन्धी सैद्धान्तिक ज्ञानका साथै प्राविधिक सीप र व्यवहारिक अभ्याससमेत गराइने प्रतिष्ठानले जनाएको छ।
प्राकृतिक विपद्को क्षेत्रमा लामो समयदेखि स्वदेश तथा विदेशमा कार्यरत विषय विज्ञहरूले प्रशिक्षणमा प्रशिक्षकका रूपमा सहजीकरण गर्नेछन्।
प्रशिक्षणमार्फत विपद्का समयमा सचेतना अभिवृद्धिदेखि प्रतिकार्यसम्म प्रभावकारी रूपमा काम गर्न सक्ने दक्ष युवाशक्ति निर्माण हुने नेपाली कांग्रेसको विश्वास छ। आगामी दिनमा ‘हरेक जिल्लामा विपद् व्यवस्थापन स्वयंसेवक’ को अवधारणाअनुसार कार्यक्रम अघि बढाउने योजना प्रतिष्ठानले बनाएको छ।
प्रतिष्ठानका कार्यवाहक मुख्य सचिव कृष्णप्रसाद दुलालले प्रशिक्षणबाट विपद् व्यवस्थापनका क्षेत्रमा सक्रिय र दक्ष स्वयंसेवक तयार गर्न सहयोग पुग्ने बताउनुभएको छ।
