काठमाडौँ । प्रधानमन्त्री बालेन्द्र साहले प्लाइउड तथा काठजन्य सामग्रीको निर्यातमा देखिएका अवरोध तत्काल हटाउन सम्बन्धित निकायलाई निर्देशन दिनुभएको छ ।
नेपाल उद्योग वाणिज्य महासंघको निर्यात समितिका प्रतिनिधिसँग शुक्रबार सिंहदरबारमा भएको भेटवार्ताका क्रममा प्रधानमन्त्री साहले प्लाइउड निर्यातमा देखिएका नीतिगत तथा प्राविधिक समस्या समाधान गर्न निर्देशन दिनुभएको हो ।
भेटमा प्लाइउड क्षेत्रको वर्तमान अवस्था, लगानी, निर्यातको सम्भावना र विद्यमान समस्याबारे विस्तृत छलफल भएको नेपाल उद्योग वाणिज्य महासंघको निर्यात समितिका सभापति होमप्रसाद दाहालले जानकारी दिनुभयो । उहाँका अनुसार व्यवसायीहरूले कच्चा पदार्थको आपूर्ति, भारतीय गुणस्तर मापदण्ड (बीआईएस) र नेपाल गुणस्तर (एनएस) बीचको समकक्षता कायम गर्नुपर्ने लगायतका विषयमा प्रधानमन्त्रीको ध्यानाकर्षण गराएका थिए ।
विशेषगरी प्लाइउड, ढोका तथा अन्य काठजन्य सामग्री निर्यातका लागि आवश्यक फाइटो स्यानिटरी तथा फ्युमिगेसन सर्टिफिकेटसम्बन्धी कार्यविधि नहुँदा निर्यात प्रक्रिया प्रभावित भएको व्यवसायीहरूले बताएका थिए । त्यसपछि प्रधानमन्त्री साहले क्वारेन्टाइनसम्बन्धी आवश्यक कार्यविधि तत्काल तयार गरी निर्यात प्रक्रिया अघि बढाउन सम्बन्धित निकायलाई निर्देशन दिनुभएको दाहालले बताउनुभयो ।
सरकारले अघि सारेको काठ निर्यातको योजनालाई प्रभावकारी बनाउन सल्लो तथा अन्य हार्डउडजन्य सामग्रीको निर्यातका लागि आवश्यक कार्यविधि तयार गर्न पनि प्रधानमन्त्रीले निर्देशन दिनुभएको छ ।
दाहालका अनुसार व्यवसायीहरूले नेपालबाट ठूलो परिमाणमा निर्यात गर्न सकिने सम्भावना रहेको प्लाइउड उद्योगका समस्या र चुनौतीबारे प्रधानमन्त्रीलाई जानकारी गराएका थिए । प्रधानमन्त्रीले व्यवसायीका कुरा सुन्दै तत्काल समाधान गर्न सकिने विषयमा सम्बन्धित निकायलाई निर्देशन दिनुभएको उहाँले बताउनुभयो ।
यसैगरी, स्वदेशमै तयारी वस्तु उत्पादन गर्ने सम्भावना हुँदाहुँदै ठूलो परिमाणमा कच्चा पदार्थ मात्रै विदेश निर्यात भइरहेको विषयमा समेत छलफल भएको थियो । कच्चा पदार्थको निर्यात घटाउँदै प्रशोधित तथा तयारी वस्तुको निर्यात बढाउन सरकारले आवश्यक नीति र सहजीकरण गर्ने प्रतिबद्धता जनाएको दाहालले जानकारी दिनुभयो ।
प्रधानमन्त्रीको सक्रियतापछि प्लाइउड तथा काठजन्य सामग्री निर्यातमा देखिएका क्वारेन्टाइनसम्बन्धी समस्या छिट्टै समाधान हुनेमा व्यवसायीहरू आशावादी देखिएका छन्।
