काठमाडौं । नेपालका ऐतिहासिक तथा कलात्मक सम्पदाको पुनर्निर्माणमा मौलिकता र गुणस्तर कायम गर्न प्रधानमन्त्रीले विशेष चासो देखाउनुभएको छ ।
सम्पदा पुनर्निर्माणका क्रममा मौलिक कला र पहिचान कमजोर हुँदै गएको तथा निर्माणको गुणस्तरमा समेत कमी आएको गुनासो सम्बोधन गर्न प्रधानमन्त्रीले नेपाल हस्तकला महासंघ र नेपाल निर्माण व्यवसायी महासंघका प्रतिनिधिसँग संयुक्त छलफल गर्नुभएको हो ।
नेपाल हस्तकला महासंघका अध्यक्ष रविन्द्र शाक्यका अनुसार यसअघि प्रधानमन्त्रीसँगको भेटमा महासंघले सम्पदा पुनर्निर्माणका क्रममा नेपालको मौलिक कला, संस्कृति र पहिचान संरक्षण हुन नसकेको विषयमा ध्यानाकर्षण गराएको थियो । महासंघ गैरनाफामूलक संस्था भएकाले सरकारी ठेक्का प्रक्रियामा प्रत्यक्ष सहभागी हुन नसक्ने प्राविधिक कठिनाइ रहेको जानकारी गराउँदै निर्माण व्यवसायीसँग समन्वय गरेर काम गर्ने वातावरण बनाउनुपर्ने प्रस्ताव महासंघले गरेको थियो ।
हस्तकला महासंघको उक्त प्रस्ताव र गुनासोप्रति प्रधानमन्त्रीले तत्कालै सक्रियता देखाउनुभएको अध्यक्ष शाक्यले बताउनुभयो । उहाँका अनुसार गुनासो राखेको दुई दिनभित्रै प्रधानमन्त्रीले निर्माण व्यवसायी महासंघ र हस्तकला महासंघका पदाधिकारीलाई संयुक्त रूपमा बैठकमा बोलाई आगामी दिनमा सहकार्य र समन्वय गरेर उच्च गुणस्तरका संरचना तथा कलात्मक उत्पादन निर्माण गर्ने विषयमा छलफल गर्नुभएको हो ।
अध्यक्ष शाक्यले प्रधानमन्त्रीको शीघ्र पहलले व्यवसायी तथा हस्तकलाकर्मीमा नयाँ उत्साह र सकारात्मक ऊर्जा थपिएको बताउनुभयो ।
उहाँले भन्नुभयो, ‘पुनःसंरचना तथा कलात्मक सम्पदा निर्माण गर्ने क्रममा हाम्रो मौलिक कला र पहिचान केही कमजोर हुँदै गएको तथा मौलिकताअनुसार उच्च गुणस्तरका कला सिर्जनामा कमी आएको विषयमा हामीले प्रधानमन्त्रीसमक्ष धारणा राखेका थियौँ । हस्तकला महासंघ गैरनाफामूलक संस्था भएकाले ठेक्कापट्टाको प्रक्रियामा प्रत्यक्ष सहभागी हुन नसक्ने अवस्था छ । तर निर्माण व्यवसायी संघ–संस्थाले नेपाल सरकारसँग गर्ने ठेक्का प्रक्रियामा हामीसँग सहकार्य र समन्वय गर्न सकेमा नेपालको कला, संस्कृति संरक्षण तथा मौलिकताको प्रवद्र्धनमा सकारात्मक परिणाम ल्याउन सकिने कुरा राखेका थियौँ ।’
उहाँका अनुसार सोही विषयलाई मध्यनजर गर्दै प्रधानमन्त्रीले दुई दिनभित्रै निर्माण व्यवसायी महासंघ र हस्तकला महासंघलाई संयुक्त रूपमा सहभागी गराई आगामी दिनमा कसरी समन्वय गरेर उच्च गुणस्तरका संरचना तथा कलात्मक उत्पादन निर्माण गर्न सकिन्छ भन्ने विषयमा छलफल गर्नुभएको हो ।
अध्यक्ष शाक्यले सम्बन्धित सरोकारवालालाई यति छिटो एकै ठाउँमा ल्याएर सकारात्मक पहल सुरु गरिनुले आफूहरूमा नयाँ ऊर्जा र विश्वास थपिएको बताउनुभयो ।
दुवै महासंघबीच प्रभावकारी समन्वय हुन सकेमा सरकारी ठेक्कापट्टाको प्रक्रियागत जटिलता समाधान गर्दै निर्माण व्यवसायीको अनुभव र हस्तकलाकर्मीको सीपलाई एकीकृत गर्न सकिने अपेक्षा गरिएको छ । यसबाट ऐतिहासिक तथा कलात्मक सम्पदाको पुनर्निर्माणमा उच्च गुणस्तर कायम हुनुका साथै नेपालको मौलिक कला, संस्कृति र पहिचानको संरक्षणमा समेत महत्वपूर्ण योगदान पुग्ने विश्वास गरिएको छ ।
