काठमाडौं। राष्ट्रिय स्वतन्त्र पार्टी (रास्वपा)का सभापति रवि लामिछानेले काठमाडौंका विभिन्न सञ्चार प्रतिष्ठान अगाडि सोमबार गरिएका शङ्कास्पद सवारी पार्किङको घटनाबारे निष्पक्ष छानबिन हुनुपर्ने बताएका छन्।
मंगलबार संसद् भवन परिसरमा सञ्चारकर्मीसँग कुरा गर्दै उनले उक्त घटनाप्रति पार्टीको धारणा स्पष्ट रहेको उल्लेख गरे। उनले यस्ता गतिविधि अस्वाभाविक रहेको भन्दै सत्यतथ्य बाहिर ल्याउन अनुसन्धान आवश्यक रहेको बताए।
‘यो गलत हो भनेर पार्टीले सुरुदेखि नै स्पष्ट धारणा राखेको छ। घटनाको छानबिन हुनुपर्छ भन्ने हाम्रो माग पनि हो,’ लामिछानेले भने, ‘यो घटनालाई हेर्ने हाम्रो दृष्टिकोण स्पष्ट छ। तर देखिएको प्रवृत्ति अस्वाभाविक छ।’
लामिछानेले घटनामा रास्वपाका कुनै नेता वा कार्यकर्ता संलग्न भएको पुष्टि भए कानुन र पार्टीको विधानअनुसार कारबाही गरिने स्पष्ट पारे।
फरक प्रसङ्गमा उनले प्रधानमन्त्री बालेन्द्र शाहसँग भएको भेटवार्तामा सुकुम्बासी समस्या लगायत समसामयिक विषयमा छलफल भएको जानकारी दिए।
