काठमाडौँ । राहदानी विभागले सोमबारदेखि नयाँ प्रणालीमार्फत राहदानी सेवा प्रवाह सुरु गरेको जनाएको छ। विभागका अनुसार नयाँ प्रक्रियाबाट केही सेवाग्राहीले आवेदन प्रक्रिया पूरा गरी पहिलो दिनमै राहदानी सेवा प्राप्त गरिसकेका छन्।
विभागले नयाँ राहदानी लिन वा म्याद सकिएको तथा अन्य कारणले नवीकरण गर्नुपर्ने सेवाग्राहीले विगतझैँ आफ्नो स्थायी बसोबास रहेको जिल्ला प्रशासन कार्यालय, राहदानी विभाग तथा विदेशस्थित नेपाली नियोगबाट सेवा लिन सक्ने जनाएको छ।
नयाँ प्रणालीको स्थिरीकरण अवधि तीन महिनासम्म रहने भएकाले यस अवधिमा सामान्य प्राविधिक समस्या देखिन सक्ने भए पनि राहदानी सेवा नियमित, सहज र सुचारु रूपमा सञ्चालन हुने विभागको विश्वास छ। विभागले सेवासम्बन्धी थप जानकारी आफ्नो वेबसाइटबाट प्राप्त गर्न सकिने जनाएको छ।
