काठमाडौं । जाजरकोटको भेरी नगरपालिका–२ राङसीमा पहिरोले घर पुरिँदा एक महिलाको मृत्यु भएको छ भने अन्य दुई जना घाइते भएका छन्।
गएराति परेको अविरल वर्षापछि घरमाथिबाट खसेको पहिरोले ६० वर्षीया जयशिला शाहको घटनास्थलमै मृत्यु भएको जिल्ला प्रहरी कार्यालय जाजरकोटले जनाएको छ। प्रहरीका अनुसार राति सुतिरहेको अवस्थामा पहिरोले घर पुरिँदा उनको ज्यान गएको हो।
जिल्ला प्रहरी कार्यालयका सूचना अधिकारी प्रहरी निरीक्षक सुधिरकुमार खड्काका अनुसार मृतककी ४० वर्षीया छोरी मेनुका शाह (थापा) र सात वर्षीया नातिनी टिका थापा सामान्य घाइते भएका छन्। स्थानीयवासी र प्रहरी टोलीले उनीहरूको उद्धार गरी उपचारका लागि अस्पताल पठाएको प्रहरीले जनाएको छ।
