काठमाडौं । विभिन्न राजनीतिक दलसँग आबद्ध सुकुम्बासीसम्बन्धी संघ–संगठनहरूले भूमिहीन सुकुम्बासीलाई तत्काल लालपूर्जा उपलब्ध नगरिए सरकारविरुद्ध सशक्त आन्दोलनमा उत्रिने चेतावनी दिएका छन्।
आइतबार काठमाडौंमा आयोजित पत्रकार सम्मेलनमा नेपाल कम्युनिष्ट पार्टी (नेकपा) निकट अखिल नेपाल सुकुम्बासी संघसहितका विभिन्न संगठनहरूले सरकारले सुकुम्बासी व्यवस्थापनको नाममा आश्वासन मात्रै बाँड्दै आएको आरोप लगाए।
अखिल नेपाल सुकुम्बासी संघका इन्चार्ज नहेन्द्र खड्काले सरकारले विधि र प्रक्रियाअनुसार भूमिहीन सुकुम्बासीलाई तत्काल लालपूर्जा वितरण गर्नुपर्ने माग गर्दै त्यसो नगरे कडा संघर्षमा उत्रिन बाध्य हुने चेतावनी दिनुभयो। उहाँले सरकार सुकुम्बासीलाई झुक्याउने र ढाँट्ने काममा लागेको आरोप लगाउँदै लाखौं भूमिहीन, किसान, दलित तथा उत्पीडित समुदायको अधिकारका लागि आन्दोलन अपरिहार्य बन्न सक्ने बताउनुभयो।
त्यस्तै, संयुक्त राष्ट्रिय सुकुम्बासी मोर्चा नेपालका कार्यवाहक अध्यक्ष नारायण परिश्रमीले सरकारले भूमिहीन, सुकुम्बासी, दलित तथा अव्यवस्थित बसोबासीका लागि बनेका ऐन–कानुनसमेत कार्यान्वयन नगरेर गरिब नागरिकमाथि अन्याय गरेको आरोप लगाउनुभयो। उहाँले जनतालाई झुटा आश्वासन दिएर शासन सञ्चालन गर्ने प्रवृत्ति त्याग्न सरकारलाई आग्रह गर्नुभयो।
कार्यवाहक अध्यक्ष परिश्रमीले सरकार राष्ट्रियताको विषयमा समेत गम्भीर षड्यन्त्रमा लागेको आरोप लगाउँदै देश कुनै एक सरकारको मात्रै नभई सम्पूर्ण नेपाली जनताको साझा सम्पत्ति भएकाले जनताको अधिकारमाथि हस्तक्षेप स्वीकार्य नहुने चेतावनी दिनुभयो।
सुकुम्बासी संगठनहरूले भूमिहीन नागरिकको समस्या समाधानका लागि लालपूर्जा वितरणको प्रक्रिया तत्काल अघि नबढाइए देशव्यापी आन्दोलनका कार्यक्रम घोषणा गर्ने समेत बताएका छन्।
