काठमाडौं । चर्चित हास्य कलाकार, अभिनेत्री तथा निर्देशक दीपाश्री निरौलाको ब्रेन ट्युमरको सफल शल्यक्रिया गरिएको छ।
माइतीघरस्थित अन्नपूर्ण न्यूरो हस्पिटलमा वरिष्ठ न्यूरो सर्जन डा. बसन्त पन्तको नेतृत्वमा रहेको चिकित्सक टोलीले उनको सफल शल्यक्रिया गरेको हो।
शल्यक्रियापछि दीपाश्रीको स्वास्थ्य अवस्था क्रमिक रूपमा सुधार हुँदै गएको निर्माता तथा कलाकार दीपकराज गिरीले सामाजिक सञ्जालमार्फत जानकारी दिनुभयो ।
गिरीले सामाजिक सञ्जालमार्फत दीपाश्रीको स्वास्थ्य अवस्थाबारे जानकारी दिँदै यो साता आफ्नो टोलीका लागि अत्यन्त चुनौतीपूर्ण र कठिन समय रहेको बताएका छन्।
गिरीका अनुसार चलचित्रको सुटिङकै क्रममा दीपाश्रीलाई ब्रेन ट्युमर भएको पत्ता लागेको थियो। त्यसपछि तत्काल शल्यक्रिया गर्नुपर्ने अवस्था सिर्जना भएको र उपचारका लागि भारत जानुपर्ने सुझाव पनि धेरैबाट आएको उनले उल्लेख गरेका छन्। तर अन्ततः नेपालकै वरिष्ठ न्यूरो सर्जन डा. बसन्त पन्तको नेतृत्वमा माइतीघरस्थित अन्नपूर्ण न्यूरो हस्पिटलमा शल्यक्रिया गर्ने निर्णय गरिएको थियो।
गिरीले लेखेका छन्, “भगवानको आशीर्वादले शल्यक्रिया सफलतापूर्वक सम्पन्न भयो। हाल उहाँ आईसीयूबाट जनरल वार्डमा आएर स्वास्थ्यलाभ गर्दै हुनुहुन्छ। आशीर्वाद दिने दर्शक तथा शुभचिन्तकहरू तथा उपचारमा संलग्न सम्पूर्ण स्वास्थ्यकर्मीलाई धन्यवाद। जय पशुपतिनाथ।”
शल्यक्रिया सफल भएपछि दीपाश्री हाल चिकित्सकको निगरानीमा स्वास्थ्यलाभ गरिरहेकी छन्। उनका शुभचिन्तक, कलाकार तथा प्रशंसकहरूले सामाजिक सञ्जालमार्फत शीघ्र स्वास्थ्यलाभको कामना गरिरहेका छन्।
दीपाश्रीलाई स्वास्थ्य लाभको कामना गर्न प्रख्यात संगीतकार शम्भूजीत बासकोटा, बरिष्ठ कलाकार निर्मल शर्मा लगायतका श्रष्टाहरु अस्पताल पुग्नु भएको थियो ।
दीपाश्री निरौला नेपाली हास्य तथा चलचित्र क्षेत्रमा लोकप्रिय कलाकारका रूपमा परिचित छन्। टेलिभिजन धारावाहिक ‘तितो सत्य’ देखि ‘छक्का पञ्जा’ चलचित्र शृंखलासम्म उनले अभिनय र निर्देशनमार्फत नेपाली मनोरञ्जन क्षेत्रमा उल्लेखनीय योगदान दिएकी छन्।
