काठमाडौँ । भन्सार विभागका महानिर्देशक श्यामप्रसाद भण्डारीलाई अर्थ मन्त्रालयमा तानिएपछि विभागको निमित्त महानिर्देशकको जिम्मेवारी भरतमणि पाण्डेलाई दिइएको छ।
अर्थमन्त्री डा. स्वर्णिम वाग्लेको मन्त्रिस्तरीय निर्णयअनुसार भण्डारीलाई सोमबार अर्थ मन्त्रालयमा सरुवा गरिएको हो। त्यससँगै विभागको दैनिक प्रशासनिक तथा कार्यकारी जिम्मेवारी पाण्डेलाई सुम्पिएको स्रोतले जनाएको छ।
भण्डारी २०८२ साल भदौ १ गतेदेखि भन्सार विभागको महानिर्देशकका रूपमा कार्यरत थिए। तर, चालु आर्थिक वर्षको बजेट सार्वजनिक हुनुअघि रसुवा भन्सार नाकाबाट भएका केही सवारीसाधनको जाँचपास प्रक्रियामा अनियमितता तथा त्रुटि भेटिएपछि विभागीय नेतृत्वमाथि पनि प्रश्न उठेको थियो।
उक्त घटनाको छानबिनपछि १३ जना कर्मचारीमाथि कारबाही गरिएको थियो। सोही प्रकरणमा विभागीय प्रमुखका रूपमा नैतिक जिम्मेवारी वहन गराउनुपर्ने निष्कर्षसहित भण्डारीलाई मन्त्रालयमा तानिएको बुझिएको छ।
यस घटनापछि भन्सार प्रशासनमा नेतृत्व परिवर्तन गरिएको हो भने रसुवा भन्सारमा भएको जाँचपास प्रकरणबारे थप अनुसन्धान र प्रशासनिक प्रक्रिया अघि बढिरहेको बताइएको छ।
