काठमाडौं । देशभर मनसुनी गतिविधि सक्रिय बन्दै जाँदा मंगलबार दिउँसो मधेस प्रदेशबाहेक सबै प्रदेशका विभिन्न स्थानमा वर्षा भइरहेको छ।
मौसम पूर्वानुमान महाशाखाले दिउँसो १:०५ बजे जारी गरेको सूचनाअनुसार कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका विभिन्न जिल्लामा वर्षा भइरहेको हो। मधेस प्रदेशमा भने तत्काल वर्षा नदेखिएको महाशाखाले जनाएको छ।
पछिल्लो २४ घण्टाको वर्षा विवरणअनुसार सबैभन्दा धेरै वर्षा कञ्चनपुरको हनुमान नगरमा मापन गरिएको छ। त्यहाँ १४७.४ मिलिमिटर वर्षा भएको महाशाखाको तथ्यांकले देखाएको छ।
मौसमविद्का अनुसार २४ घण्टामा १०० मिलिमिटरभन्दा बढी वर्षा भए त्यसलाई ‘धेरै भारी वर्षा’को श्रेणीमा राखिन्छ। यस किसिमको वर्षाले नदी तथा खोलामा पानीको बहाव बढ्ने, डुबान, बाढी र पहिरोको जोखिम उच्च हुने भएकाले सतर्कता अपनाउन मौसमविद्ले आग्रह गरेका छन्।
