काठमाडाैँ । नेपाली कम्युनिष्ट पार्टीका नेता एवं पुर्वप्रधानमन्त्री झलनाथ खनालले महाकाली सन्धी गर्नु गलत भएको बताउनुभएको छ ।
मदन भण्डारी फाउण्डेशनले आयोजना गरेको कार्यक्रममा उहाँले यस्तो बताउनुभएको हो ।
उहाँले महाकाली सन्धीबाट नेपालले अपेक्षित उपलब्धि हासिल गर्न नसकेको बताउनुभयो । महाकाली सन्धीले बदनाम बाहेक केही नदिएको उहाँको टिप्पणी छ । उहाँले महाकाली र एमसीसी सम्झौताको उपलब्धी शुन्य रहेको उल्लेख गर्नुभयो । उहाँले मदन भण्डारीको सक्रियता कारण टनकपुर सम्झौता रोकिएको स्मरण गर्नुहुँदै भण्डारीले अघि सारेको राष्ट्रियताको धारलाई निरन्तरता दिन नसकेको कारण महाकाली सन्धी हुन पुगेको बताउनु भयो ।
उहाँले वर्तमान सरकारले राष्ट्रिय हितलाई कमजोर बनाउने नीति अवलम्वन गरेको आरोप पनि लगाउनु भयो । सरकारका नीति तथा कार्यक्रमले किसान, श्रमिक र श्रमिकहरूको ट्रेड युनियन अधिकारलाई सम्बोधन नगरेको उहाँको दाबी छ । विद्यार्थी संगठनका अधिकारमा समेत हस्तक्षेप भइरहेको उहाँले बताउनु भयो ।
निजी सञ्चारमाध्यमलाई उपलब्ध गराइँदै आएको सहुलियत र सरकारी विज्ञापन कटौती गरिएको उल्लेख गर्दै उहाँले त्यसको प्रत्यक्ष असर पत्रकारिता क्षेत्रमा परेको बताउनु भयो । यसले सञ्चार क्षेत्र कमजोर बन्ने र ठूलो संख्यामा पत्रकार बेरोजगार हुने जोखिम बढाएको उहाँको भनाई छ ।
