काठमाडौं । प्रमुख प्रतिपक्षी दल नेपाली कांग्रेसकी सांसद रेणुका काउचाले सत्तारुढ राष्ट्रिय स्वतन्त्र पार्टी (रास्वपा)ले १८ वर्षमुनिका ३५ हजारभन्दा बढी बालबालिकालाई पार्टीको सदस्य बनाएको विषय गम्भीर र आश्चर्यजनक रहेको बताएकी छन्।
आइतबार प्रतिनिधिसभाको बैठकमा बोल्दै सांसद काउचाले नेपालको संविधान, राजनीतिक दलसम्बन्धी ऐन, २०७३ तथा बालबालिकासम्बन्धी ऐन, २०७५ विपरीत रास्वपाले बालबालिकालाई पार्टीको सदस्य बनाएको आरोप लगाइन्। उनले उक्त विषयमा सरकार र सम्बन्धित निकायको ध्यानाकर्षण गराउँदै कानुनअनुसार कारबाही हुनुपर्ने वा नपर्ने भन्ने प्रश्न समेत उठाइन्।
उनले रास्वपाको पहिलो महाधिवेशन सम्पन्न भएकोमा बधाई दिँदै औपचारिक रूपमा सार्वजनिक गरिएको तथ्यांकअनुसार १८ वर्षमुनिका ३५ हजार २५७ जना पार्टीको सदस्य रहेको उल्लेख गरिन्। यस्तो विषयप्रति नेपाली कांग्रेसको गम्भीर ध्यानाकर्षण भएको उनको भनाइ थियो।
सांसद काउचाले संविधान र राजनीतिक दलसम्बन्धी ऐनअनुसार १८ वर्षभन्दा कम उमेरका बालबालिकालाई राजनीतिक दलको सदस्य बनाउन नपाइने व्यवस्था रहेको स्मरण गराइन्। उनले उक्त कानुन उल्लंघन गरेमा ८० हजार रुपैयाँसम्म जरिवाना र तीन वर्षसम्म कैद सजायको व्यवस्था रहेको उल्लेख गर्दै सत्तारुढ दलका हकमा संविधान र कानुन लागू नहुने हो भन्ने प्रश्न गरिन्।
उनले बालबालिकासम्बन्धी ऐन, २०७५ ले पनि कुनै पनि बालबालिकालाई राजनीतिक उद्देश्य पूरा गर्न प्रयोग गर्न नपाइने स्पष्ट व्यवस्था गरेको उल्लेख गर्दै रास्वपाले त्यही कानुनको उल्लंघन गरेको आरोप लगाइन्। साथै, बालबालिकाको सहभागिताका आधारमा निर्वाचित पदाधिकारी तथा सदस्यहरूको वैधानिकतामाथि समेत प्रश्न उठ्ने अवस्था सिर्जना भएको उनको भनाइ थियो।
सांसद काउचाले विद्यार्थीले राजनीति गर्नु हुँदैन भन्दै स्वतन्त्र विद्यार्थी युनियन (स्ववियु) लगायतका संगठनमाथि प्रश्न उठाउने सरकारले आफ्नै पार्टीमा बालबालिकालाई सदस्यका रूपमा राख्न मिल्ने वा नमिल्ने भन्ने विषयमा स्पष्ट हुनुपर्ने बताइन्। उनले कलिला बालबालिकालाई पार्टीको झोला बोकाउने कार्य स्वीकार्य हुन नसक्ने भन्दै रास्वपालाई संविधान र कानुनको पूर्ण पालना गर्न आग्रह गरिन्।
उनले रास्वपा संविधान र कानुनभन्दा माथि नरहेको उल्लेख गर्दै सबै राजनीतिक दलले कानुनी व्यवस्था पालना गर्दै अघि बढ्नुपर्नेमा जोड दिइन्।
