कपिलबस्तु । नेकपा एमालेका अध्यक्ष केपी शर्मा ओलीले केही लोभीपापीका कारण सरकार बाट बाहिरिनु परेको बताउनु भएको छ । कपिलवस्तुको बहादुरगंजमा आयोजित कार्यक्रममा ओलीले भन्नुभयो 'केही लोभीपापीका कारण हामी सरकारमा त छैनौं, तर त्यो विधिले होइन जालझेलले हो ।'
उहाँले भन्नुभयो 'यसको फैसला जनताले आउदो निर्बाचनमा गर्नेछन् ।' कपिलबस्तुका नेता मंगलप्रसाद गुप्ता सहित का कार्यकर्ताहरु लाई पार्टी प्रवेश गराउदै ओलीले भन्नुभयो 'मधेसमा नेकपा एमालेको जनलहर देखेर विरोधीहरुलाई जलन भएको छ ।'
ओलीले नेपालको राजनीति अब विकास र समृद्धिमा केन्द्रीत हुनुपर्ने भन्दै आफ्नो कार्यकालमा मधेसमा गरेको विकासको अभियानले यो लहर बढ्दै गएको दाबी गर्नुभयो । ओलीले कपिलवस्तुको उर्बर भूमिलाई सिंचाइ गर्नका लागि रोकिएको नौमुरे परियोजनालाई आफ्नो कार्यकालमा अगाडि बढाएको बताउनु भयो । उहाँले भन्नुभयो ‘यता नेपालतर्फ बाँझो जमिन छ उता भारततर्फ खेती भइरहेको छ, यो कदापी हुँदैन’ ओलीले भने, ‘कपिलवस्तुमा कृषि सिंचाइको लागि अब नौमुरे योजना छिट्टै सुरू हुन्छ ।’
कार्यक्रममा एमाले महासचिब शंकर पोखरेल ,सचिवहरु लेखराज भट्ट, छविलाल विश्वकर्मा तथा एमाले प्रवेश गरेका नेता मंगलप्रसाद गुप्ताले सम्बोधन गर्नुभएको थियो ।
