काठमाडौं । राष्ट्रिय स्वतन्त्र पार्टी (रास्वपा)को महामन्त्री पदका उम्मेदवार जगदीश खरेलले आफ्नो उम्मेदवारी फिर्ता लिएका छन्।
खरेलले सामाजिक सञ्जालमार्फत उम्मेदवारी फिर्ता लिएको घोषणा गर्दै पार्टीमा सहमति, एकता र दीर्घकालीन यात्रालाई प्राथमिकता दिँदै यो निर्णय गरेको बताएका छन्।
‘हामीले अझै लामो बाटो तय गर्न बाँकी छ। सहमति र एकतालाई बलियो बनाउन गरिएको सल्लाहअनुसार महामन्त्री पदको उम्मेदवारी फिर्ता लिएको हुँ,’ उनले उल्लेख गरेका छन्।
रास्वपाको प्रथम राष्ट्रिय महाधिवेशनबाट केन्द्रीय सदस्यमा निर्वाचित भएका खरेलले त्यसपछि महामन्त्री पदमा उम्मेदवारी दिएका थिए। उम्मेदवारी फिर्तासँगै महामन्त्री पदको प्रतिस्पर्धामा नयाँ समीकरण बनेको छ।
