काठमाडौं । राष्ट्रिय स्वतन्त्र पार्टी (रास्वपा) को पहिलो राष्ट्रिय महाधिवेशन अन्तर्गत चौथो दिन प्रतिनिधिहरूलाई विशेष सामग्रीसहितको झोला वितरण गरिएको छ।
देशका विभिन्न जिल्लाबाट महाधिवेशनमा सहभागी भएका प्रतिनिधिहरूलाई बन्दसत्र तथा संगठनात्मक गतिविधिमा सहजता प्रदान गर्ने उद्देश्यले उक्त सामग्री उपलब्ध गराइएको पार्टीले जनाएको छ।
महाधिवेशन सचिवालयका अनुसार प्रतिनिधिहरूको पहिचान, व्यवस्थापन तथा कार्यक्रम सञ्चालनलाई थप प्रभावकारी बनाउन आवश्यक सामग्रीसहितको झोला वितरण गरिएको हो। झोलाभित्र पार्टीको लोगो अंकित क्याप, पेन, कपी तथा परिचयपत्रलगायत सामग्री राखिएको छ।
प्रतिनिधिहरूले यस्तो व्यवस्थाले महाधिवेशनका छलफल, निर्णय प्रक्रिया र टिपोट कार्यलाई सहज बनाएको बताएका छन्। साथै, एकीकृत व्यवस्थापनका कारण कार्यक्रम थप अनुशासित र व्यवस्थित देखिएको उनीहरूको भनाइ छ।
रास्वपाले आफ्नो पहिलो राष्ट्रिय महाधिवेशनलाई प्रविधिमैत्री, व्यवस्थित तथा मितव्ययी बनाउन विशेष ध्यान दिइएको जनाएको छ। पार्टीले आधुनिक व्यवस्थापन र सहभागीमैत्री अभ्यासमार्फत महाधिवेशनलाई सफल बनाउने लक्ष्य लिएको बताएको छ।
