काठमाडौं । मदन भण्डारी मेमोरियल कलेजले आफ्नो स्थापनाको २५औँ वार्षिकोत्सवका अवसरमा सप्ताहव्यापी रजत महोत्सव कार्यक्रम आयोजना गर्ने भएको छ ।
कलेजले आजदेखि असार १४ गतेसम्म विविध शैक्षिक, सिर्जनात्मक तथा सामाजिक कार्यक्रम सञ्चालन गर्दै रजतजयन्ती भव्य रूपमा मनाउने घोषणा गरेको हो ।
आज काठमाडौँमा आयोजित विशेष पत्रकार सम्मेलनमा क्याम्पस प्रमुख डा बाबुराम अधिकारीले विसं २०५८ असार १४ गते स्थापना भएको क्याम्पसले २५ वर्षे यात्रा पूरा गर्न लागेको जानकारी दिँदै सो अवसरलाई विशेष बनाउन सप्ताहव्यापी कार्यक्रम तय गरिएको बताउनुभयो ।
उहाँका अनुसार असार ९ गते ‘करियर एक्स्पो’ आयोजना गरिनेछ । जहाँ विभिन्न कम्पनीका कक्ष, रोजगारदाता तथा विद्यार्थीबीच प्रत्यक्ष अन्तरक्रिया, इन्टनसीप तथा रोजगारीका अवसरबारे जानकारी प्रदान गरिनेछ । साथै उद्योगी, व्यवसायी तथा विभिन्न पेसाकर्मीहरूसँग अन्तरक्रिया र नेटवर्किङ कार्यक्रमसमेत सञ्चालन गरिनेछ ।
कार्यक्रमअन्तर्गत ‘फुड फेस्ट’, विद्यार्थीहरूको उत्तरदायित्व विकास, कला तथा इ-स्पोट्र्स प्रतियोगिता, सामाजिक संवाद र सामुदायिक सहभागितासम्बन्धी विविध कार्यक्रम समावेश गरिएको क्याम्पस प्रशासनले जनाएको छ । रजत महोत्सवको समापन समारोह असार १४ गते आयोजना हुने क्याम्पस व्यवस्थापन समितिका अध्यक्ष महेन्द्रबहादुर पाण्डेले जानकारी दिनुभयो ।
उहाँका अनुसार उक्त समारोहमा उपराष्ट्रपति रामसहायप्रसाद यादव प्रमुख अतिथिका रूपमा सहभागी हुनुहुनेछ । समापन समारोह कै अवसरमा क्याम्पसले तयार गरेको ‘कलेज गान’ सार्वजनिक गरिने छ भने वार्षिक साहित्यिक प्रकाशन ‘श्वेत शार्दूल’ को २२औँ अङ्क विमोचन गरिने कार्यक्रम रहेको छ ।
पत्रकार सम्मेलनमा गैरनाफामूलक सामुदायिक शैक्षिक संस्थाका रूपमा क्याम्पस स्थापित रहेको जानकारी दिइएको थियो । रजत महोत्सवले क्याम्पसको २५ वर्षे शैक्षिक योगदानको समीक्षा गर्दै आगामी यात्राका लागि नयाँ ऊर्जा र दिशा प्रदान गर्ने विश्वास व्यक्त गरिएको छ ।
