काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले सरकार सञ्चालनको विषयमा पार्टीका वरिष्ठ नेता बालेन शाहसँग भएको सहमति कार्यान्वयनमा कुनै समस्या आउन नदिने बताएका छन् ।
चितवनमा सुरु भएको प्रथम महाधिवेशनको उद्घाटन समारोहलाई सम्बोधन गर्दै लामिछानेले सरकार सञ्चालनको जिम्मा बालेन शाहलाई रहेको उल्लेख गरे ।
‘सरकार सञ्चालन गर्न चुनाव अगाडि नै पार्टीका वरिष्ठ नेता बालेन शाहको खुट्टामा बल पुर्याइसकेको छ । अब भटाभट गोल हान्ने जिम्मा बालेनजीको हो,’ उनले भने, ‘झुक्किएर त्यो बल कहीँ आएछ भने पनि त्यही खुट्टामा पास गर्ने जिम्मा मेरो हो ।’
उनले यस्तो अभिव्यक्ति दिँदा उपस्थित प्रतिनिधिहरूले ताली बजाएर समर्थन जनाएका थिए ।
लामिछानेले थपे, ‘यहाँ मुख मिठ्याउनेहरू पनि धेरै छन्, चुक्ली लगाउनेहरू पनि धेरै छन् । तर म तिनीहरूलाई जवाफ दिन बोलिरहेको होइन, म इतिहासलाई जवाफ दिन बोलिरहेको छु ।’
