काठमाडाैँ । राष्ट्रिय स्वतन्त्र पार्टी (रास्वपा) को प्रथम महाधिवेशनमा उपसभापति डा. स्वर्णिम वाग्लेले राजनीतिक संस्कार परिवर्तन र सुशासन केन्द्रित सम्बोधन गरेका छन्।
महाधिवेशनलाई सम्बोधन गर्दै वाग्लेले पार्टीलाई केवल सत्ताको विकल्प नभई राजनीतिक संस्कार रूपान्तरणको अभियानका रूपमा अघि बढाउनुपर्ने बताएका छन्। उनले रास्वपा कुनै अप्राकृतिक सम्झौता वा विभाजनबाट नभई नेपाली समाजमा लामो समयदेखि सञ्चित निराशा र परिवर्तनको आकांक्षाबाट जन्मिएको राजनीतिक शक्ति भएको दाबी गरे।
उनले विगतका राजनीतिक परिवर्तनले लोकतन्त्र र संविधान ल्याए पनि अपेक्षित रूपमा संस्थागत गुणस्तर विकास हुन नसकेको टिप्पणी गरे। निर्वाचन धेरै भए, तर उत्तरदायित्व कमजोर रह्यो, संविधान बने तर संस्था बलिया भएनन्, भन्दै उनले राज्य क्षमता र सार्वजनिक सेवाको गुणस्तर अपेक्षित रूपमा सुधार हुन नसकेको बताए।
वाग्लेले नेपालमा समस्या स्रोत वा सम्भावनाको अभाव नभई गलत प्रोत्साहन संरचना भएको तर्क पनि गरे। उनका अनुसार इमानदार मानिसका लागि राजनीति कठिन र पहुँचवालाका लागि सहज हुने व्यवस्था बनेको छ, जसले अस्वस्थ राजनीतिक र आर्थिक संस्कारलाई बढावा दिएको छ।
उनले रास्वपाको लक्ष्य भागबन्डा केन्द्रित प्रणालीबाट मेरिटोक्रेसीतर्फ, पहुँचमुखी अर्थतन्त्रबाट प्रतिस्पर्धात्मक अर्थतन्त्रतर्फ र नियन्त्रणमुखी राज्यबाट नागरिक–केन्द्रित शासनतर्फ अघि बढ्नु रहेको स्पष्ट पारे।
उनले पार्टीलाई आक्रोश र विरोधको शक्तिबाट मात्र नभई आशा, विकल्प र निर्माणको शक्तिका रूपमा स्थापित गर्नुपर्नेमा जोड दिए। “हामी केवल सरकार फेर्न होइन, शासन गर्ने संस्कार बदल्न आएका हौँ,” उनले भने।
वाग्लेले समावेशी र उदार लोकतन्त्र, प्रतिस्पर्धात्मक अर्थतन्त्र र समन्यायिक समाज निर्माण गर्ने पार्टीको दृष्टिकोण प्रस्तुत गर्दै राज्य नागरिकको सेवक हुनुपर्ने धारणा राखे।
उनले युवालाई विदेशिन बाध्य नपर्ने, उद्यमशीलता र रोजगारी स्वदेशमै उपलब्ध हुने वातावरण बनाउनुपर्ने आवश्यकता औँल्याए। “किसान, श्रमिक र उद्यमी सबैले सम्मानपूर्वक जीवनयापन गर्न सक्ने नेपाल निर्माण हाम्रो लक्ष्य हो,” उनले भने।
महाधिवेशनलाई ऐतिहासिक अवसरका रूपमा चित्रण गर्दै वाग्लेले रास्वपालाई आन्दोलनबाट संस्थागत राजनीतिक शक्तिमा रूपान्तरण गर्ने दिशामा अघि बढ्नुपर्ने बताए। उनले निराशालाई आशामा, आक्रोशलाई निर्माणमा र विद्रोहलाई रूपान्तरणमा बदल्न आह्वान गरे।
महाधिवेशन चितवनमा जारी रहेको छ।
