काठमाडौँ । काठमाडौँ महानगरपालिकाले असुल गर्दै आएको बहाल र व्यवसाय करलाई अझ वैज्ञानिक, न्यायोचित र करदातामैत्री बनाउने उद्देश्यसहित प्रयोजन तथा स्थान विशेषका आधारमा कर दर निर्धारण गर्ने व्यवस्था गर्ने भएको छ।
आर्थिक वर्ष २०८३/०८४ का लागि प्रस्तुत नीति तथा कार्यक्रममा महानगरले कर प्रणालीलाई सुधार गर्दै करको दायरा विस्तार गर्ने र कर प्रशासनलाई प्रभावकारी बनाउने लक्ष्य राखेको छ।
नीतिअनुसार करको दायरामा नआएका करदाताको पहिचान गरी उनीहरूलाई कर तिर्न उत्प्रेरित गरिनेछ। साथै, करदातालाई उपयुक्त छुट सुविधा प्रदान गर्नुका साथै राजस्व सेवा सम्बन्धी सूचना तथा जानकारीहरू एसएमएसमार्फत उपलब्ध गराइने व्यवस्था मिलाइनेछ।
त्यसैगरी, महालेखा नियन्त्रक कार्यालयद्वारा तयार गरिएको स्थानीय तहको राजस्व व्यवस्थापन प्रणाली (सूत्र) लागू गर्न आवश्यक तयारी गरिने उल्लेख गरिएको छ। एकीकृत करदाता परिचय नम्बर पूर्ण रूपमा लागू गरिने र बहालमा दिइएका घरजग्गा तथा अन्य संरचना एवं सम्पत्तिहरूको अनिवार्य दर्ता गर्ने व्यवस्था पनि गरिने नीति तथा कार्यक्रममा समावेश छ।
