काठमाडौँ । प्रतिनिधिसभाको बैठकमा श्रम संस्कृति पार्टीका सांसदहरूले बोल्ने समय नपाएको भन्दै आपत्ति जनाएका छन् । समय नै नमागेका कारण बोल्ने अवसर नदिएको सभामुखको भनाइपछि संसदभित्र केहीबेर असहज अवस्था सिर्जना भएको हो ।
बैठकका क्रममा सभामुखले दलगत आधारमा सांसदहरूलाई रोष्ट्रममार्फत बोल्ने क्रम अघि बढाइरहेका बेला श्रम संस्कृति पार्टीका सांसदहरूलाई भने राष्ट्रपति कार्यालयबाट प्राप्त पत्र पढ्ने तयारी गरिएको थियो ।
त्यसै क्रममा श्रम संस्कृति पार्टीका अध्यक्ष तथा सांसद हर्कराज राईसहितका सांसदहरूले उठेर आपत्ति जनाउँदै आफ्नो धारणा राख्ने अवसर माग गरेका थिए ।
त्यसपछि सभामुखले प्रतिक्रिया दिँदै भने, “माननीय सदस्यहरूले समय माग गर्नुभएको छैन, त्यसैले हो। एक घण्टादेखि समय माग गर्नुहुन्छ भन्ने अपेक्षा गरेको थिएँ।”प्रधानमन्त्री बालेन्द्र शाहको सीमासम्बन्धी अभिव्यक्तिको प्रष्टिकरण स्वयं प्रधानमन्त्रीले दिनुपर्ने भन्दै उनीहरुले संसदमा अवरोध कायमै राखेका छन् ।
