काठमाडौं । सरकारले मानव–वन्यजन्तु द्वन्द्व व्यवस्थापनका विषयमा सरोकारवालाहरू, विज्ञहरू तथा सर्वसाधारणबाट राय–सुझाव संकलन गर्न सार्वजनिक आह्वान गरेको छ।
कृषि, वन तथा पर्यावरण मन्त्रालयले मानव–वन्यजन्तु द्वन्द्व व्यवस्थापनका लागि आवश्यक नीति, कार्यक्रम तथा संस्थागत सुधारका उपायहरू सिफारिस गर्न प्राविधिक कार्यदल गठन गरेको जनाएको छ। मन्त्रालयका अनुसार माननीय मन्त्रिस्तरीय निर्णयअनुसार गठित उक्त कार्यदलमा विभिन्न सरकारी निकाय, विश्वविद्यालय, संरक्षणकर्मी, अनुसन्धानकर्ता, कृषि तथा पशु विज्ञ लगायतका प्रतिनिधिहरू सहभागी रहेका छन्।
कार्यदललाई विगतमा भएका अध्ययन–अनुसन्धान, प्रतिवेदन, नीतिगत तथा संस्थागत व्यवस्थाहरू, राहत तथा क्षतिपूर्ति प्रणाली तथा हालसम्मका व्यवस्थापन प्रयासहरूको समीक्षा गरी मानव–वन्यजन्तु द्वन्द्व न्यूनीकरणका लागि अल्पकालीन, मध्यकालीन तथा दीर्घकालीन उपायहरू सिफारिस गर्ने जिम्मेवारी दिइएको मन्त्रालयले जनाएको छ।
कार्यदलको २०८३ जेठ १८ गते बसेको बैठकले संघ, प्रदेश र स्थानीय तहका निकाय, गैरसरकारी संस्था, अनुसन्धानकर्ता, विज्ञ तथा आम नागरिकबाट सुझाव संकलन गर्ने निर्णय गरेको हो।
विशेषगरी बाँदर, बँदेल, नीलगाई तथा दुम्सीबाट कृषि बालीमा हुने क्षति न्यूनीकरणका उपायहरूमा केन्द्रित भएर सुझाव उपलब्ध गराउन मन्त्रालयले अनुरोध गरेको छ। इच्छुक व्यक्ति तथा संस्थाले सूचना प्रकाशित भएको मितिले १५ दिनभित्र आफ्नो राय–सुझाव उपलब्ध गराउन सक्नेछन्।
त्यस्तै, मानव–वन्यजन्तु द्वन्द्व सम्बन्धी अध्ययन, अनुसन्धान तथा व्यवस्थापनमा कार्यरत विज्ञहरूलाई कार्यदलमा आमन्त्रित सदस्यका रूपमा सहभागी हुन समेत मन्त्रालयले आग्रह गरेको छ।
राय–सुझाव तथा जानकारी मानव–वन्यजन्तु द्वन्द्व व्यवस्थापन प्राविधिक कार्यदलको सचिवालय, कृषि, वन तथा पर्यावरण मन्त्रालय, सिंहदरबार, काठमाडौंमा पठाउन सकिनेछ। साथै, इमेल ([hwctaskforce@mofe.gov.np](mailto:hwctaskforce@mofe.gov.np)) तथा व्हाट्सएप नम्बर ९७४४६३७८१० मार्फत समेत सुझाव पठाउन सकिने मन्त्रालयले जनाएको छ।
