काठमाडौँ । संघीय संसद्का सभामुख डोल प्रसाद (डीपी) अर्यालले विश्वको सर्वोच्च शिखर सगरमाथाको सफल आरोहण गर्नुभएका प्रतिनिधिसभा सदस्य मिङ्गा ग्याबु शेर्पालाई सम्मान गरेका छन् ।
संघीय संसद् सचिवालयमा आयोजित एक विशेष कार्यक्रममा सभामुख अर्यालले सांसद शेर्पालाई सम्मान तथा बधाई व्यक्त गरेका हुन् । कार्यक्रममा राष्ट्रिय सभाका अध्यक्ष नारायणप्रसाद दाहालले पनि सांसद शेर्पालाई बधाई तथा सम्मान व्यक्त गरेका थिए ।
कार्यक्रममा प्रतिनिधिसभाकी उपसभामुख रुबी कुमारी र राष्ट्रिय सभाकी उपाध्यक्ष लिला कुमारी भण्डारीको उपस्थिति रहेको थियो ।
सांसद शेर्पाले वि.सं. २०८३ जेठ १३ गते (मे २७, २०२६) बिहान ५:४० बजे संघीय संसद्को झण्डासहित सगरमाथाको सफल आरोहण गरेका थिए । उनी सगरमाथा आरोहण गर्ने पहिलो बहालवाला संघीय सांसद हुन् । यो उनको सगरमाथामा गरिएको दशौँ सफल आरोहण पनि हो ।
यस अवसरलाई संघीय संसद् र राजनीतिक नेतृत्वले गौरवपूर्ण उपलब्धि भन्दै प्रशंसा गरेका छन् ।
