काठमाडौं । संविधानविद् भीमार्जुन आचार्यले प्रधानमन्त्रीले संसद्मा दिएको नेपालले पनि भारतको सीमा मिचेको भन्ने अभिव्यक्तिलाई असामान्य र गम्भीर टिप्पणीका रूपमा लिएका छन्। उनले सामाजिक सञ्जालमार्फत उक्त अभिव्यक्तिप्रति आपत्ति जनाउँदै यसले नेपालको भौगोलिक अखण्डतासम्बन्धी विषयमा नकारात्मक सन्देश दिने बताएका छन्।
आचार्यले आजसम्म कुनै पनि प्रधानमन्त्रीले संसद् वा संसद् बाहिर यस्तो अभिव्यक्ति दिएको रेकर्ड नभएको उल्लेख गर्दै यस्तो धारणा अपेक्षित नभएको बताएका छन्। उनका अनुसार प्रधानमन्त्रीको यस्तो भनाइले नेपाली भूमि अतिक्रमणको विषयलाई कुनै न कुनै रूपमा फाइदा वा वैधता दिन सक्ने जोखिम रहेको छ।
उनले सीमा अतिक्रमणलाई दुई देशबीचको पारस्परिक विषयका रूपमा प्रस्तुत गर्नु सरकार प्रमुखको अभिव्यक्ति भएको भन्दै यसले नेपालको भौगोलिक अखण्डता रक्षा गर्न सरकार इच्छुक छैन वा सक्षम छैन भन्ने सन्देश प्रवाह गर्न सक्ने टिप्पणी गरेका छन्।
आचार्यले वर्तमान परिस्थितिमा देश र नागरिक अझ बढी सचेत हुनुपर्ने आवश्यकता रहेको पनि उल्लेख गरेका छन्।
